BQO-da ken ornynda gaz alaýy jaǵyldy: budan taıaýdaǵy aýylǵa keler qaýip bar ma
ORAL. KAZINFORM — Batys Qazaqstan oblysy Báıterek aýdanynda Rojkov ken ornynda gaz alaýy jaǵylǵany jóninde áleýmettik jelide beınejazba tarady.
Atalmysh ken ornyna taıaý ornalasqan Petrov aýylynyń turǵyndary túsirgen beınejazbada gazdyń laýlap janyp jatqany anyq kórinedi.
— Bul aýylda kim tursa da, aıyrma joq. Qorshaǵan ortaǵa áser etpeý úshin ken óndirý sapasyn jaqsartý kerek. Qymbat tehnologııalar ákelsin nemese muny toqtatsyn. Adamdardyń esinen tanyp, qulap jatqanynyń qajeti joq, — deıdi turǵyndardyń biri.
Osy oqıǵaǵa baılanysty Rojkov ken ornyn ıgerip jatqan «Ýral Oıl end Gaz» JShS óz pikir-paıymyn bildirdi.
— Qazirgi ýaqytta Ý-10 uńǵymasynda kásipshilik-geofızıkalyq zertteýler júrgizilip jatyr. Gazdy jaǵý bekitilgen normatıvter men ruqsat etilgen jaǵý kólemderi sheginde ambarda júzege asyrylyp jatyr, — delingen resmı málimette.
Oral qalasynan 80 shaqyrym qashyqtyqta ornalasqan Petrov eldi mekeni ıAnvartsev aýyldyq okrýgine qaraıdy. Aýyl turǵyndary ekologııalyq jaǵdaıǵa baılanysty budan buryn da shaǵymdanǵan bolatyn. Soǵan oraı olardy ıAnvartsev aýylyna kóshirý jóninde sheshim de qabyldanǵan.
Báıterek aýdanynyń ákimi Marat Toǵjanovtyń sózine qaraǵanda, «Ýral Oıl end Gaz» JShS-ǵa shıki gaz alaýyn jaǵýǵa Energetıka mınıstrliginen ruqsat berilgen.
— Kúni búgin Petrov aýylynda 14 úıde 23 adam turyp jatyr. Ázirge turǵyndardy ıAnvartsev aýylyna kóshirýge negizdeme bolmaı tur. Óıtkeni Petrov eldi mekeni ken ornyna taıaý ornalasqanymen, sanıtarlyq qorǵaý aımaǵyna kirmeıdi. Bul másele aldaǵy ýaqytta naqtylanatyn bolady, — dedi M.Toǵjanov.
BQO boıynsha ekologııa departamentiniń basshysy Murat Ermekqalıev jaǵdaımen tanys ekenin aıtyp, aqparattyń keıin beriletinin jetkizdi.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń aıtýynsha, kúni búgin aýdan mamandary oqıǵa ornyna shyqty.
— Mamandar sol mańnyń aýasyn ólsheıdi. Nátıjesin keıin aıtatyn bolamyz, — dedi N.Mustaev.
Eske sala keteıik, budan buryn BQO-da kenishke taıaý ornalasqan eldi meken turǵyndary kóshiriletinin jazǵan edik.