BQO-da «Qazavıaqutqarý» tikushaǵy apatty jaǵdaıda qondy

ASTANA. QazAqparat – Batys Qazaqstan oblysynda «Qazavıaqutqarý» AQ tikushaǵy apatty jaǵdaıda qondy. Mán-jaıdy QR Tótenshe jaǵdaılar mınıstrliginiń resmı ókili Rýslan Imanqulov málim etti, dep habarlaıdy QazAqparat.

«Batys Qazaqstan oblysynda magıstraldi munaı qubyryn sholyp qaraý barysynda «Qazavıaqutqarý» tikushaǵy apatty jaǵdaıda qondy.

Oqıǵa ornyna attanǵan mamandar sebebin anyqtaıtyn bolady.

Árıne, mundaı faktilerge barynsha jaýpkershilikpen qaraımyz. Bort saqtandyrylǵan. Merzimdi tehnıkalyq qyzmet kórsetýden 2023 jyldyń qańtarynda ótken. Ekıpajben telefon arqyly áńgimelesý boldy. Bortta bolǵandardyń barlyǵy tiri. Qandaı da bir qutqarý jumystaryna bul jaǵdaı áser etpeıdi», - dedi R.Imanqulov.

Qazirgi ýaqytta Tótenshe jaǵdaılar mınıstrliginiń barlyq qutqarý qyzmetteri, sonyń ishinde avıatsııa shtattyq rejımde jumys jasap jatyr.