BQO-da qazaqstandyq kadrlardy oqytý úshin kompanııadan 1 mlrd teńge óndirildi

ORAL. KAZINFORM — BQO mamandandyrylǵan tabıǵat qorǵaý prokýratýrasy jer qoınaýyn paıdalaný týraly zańnama aıasynda qazaqstandyq kadrlardy daıarlaý jónindegi mindettemeniń oryndalmaǵanyn anyqtady.

BQO prokýratýrasynyń baspasóz qyzmetinen málim etkenindeı, «Jer qoınaýy jáne jer qoınaýyn paıdalaný týraly» QR kodeksiniń 129-baby 1-tarmaǵyna sáıkes jer qoınaýyn paıdalanýshylar jyl saıyn qazaqstandyq mamandardy oqytýdy qarjylandyrýǵa kómirsýtek shıkizatyn óndirýge jumsalatyn shyǵyndardyń keminde 1 paıyzyn jiberýge mindetti.

Alaıda «Ýral Oıl end Gaz» JShS 2022-2023 jyldary bul mindettemeni oryndamaǵan bolyp shyqty, saldarynan 1 mlrd teńge kóleminde bereshek paıda boldy.

- Energetıka mınıstriniń 2018 jylǵy 15 mamyrdaǵy № 185 jáne Bilim jáne ǵylym mınıstriniń 2018 jylǵy 17 mamyrdaǵy № 211 birlesken buıryǵymen bekitilgen qazaqstandyq kadrlardy oqytýdy qarjylandyrý qaǵıdalaryna sáıkes bereshek memlekettik bıýdjetke qarajat aýdarý jolymen ótelýge tıis. Prokýrorlyq qadaǵalaý aktisiniń nátıjesi boıynsha sot tártibimen «Ýral Oıl end Gaz» JShS-nen bereshek túgeldeı óndirildi. Qarajat tolyǵymen bıýdjetke aýdaryldy. Bul qarjy qazaqstandyq azamattardy, sonyń ishinde halyqtyń áleýmettik jaǵynan az qamtylǵan tobyn daıarlaý men oqytýǵa bólindi, - dep habarlady vedomstvodan. 

Eske sala keteıik, budan buryn BQO-da 600-den astam bilim qyzmetkerleriniń quqyǵy buzylǵany anyqtalǵanyn jazǵan bolatynbyz.