BQO-da qaıtarylǵan aktıvter esebinen eki aýdanaralyq aýrýhana qurylysy júrgizilip jatyr

ORAL. KAZINFORM — Batys Qazaqstan oblysynda Bórli aýdany ortalyǵy Aqsaı qalasy men Kaztalov aýdany Kaztalov aýylynda kópbeıindi aýdanaralyq aýrýhanalar boı kóterip keledi.

y
Foto: BQO Qurylys basqarmasy

BQO qurylys basqarmasynan málim etkenindeı, qaıtarylǵan aktıvter esebinen qos nysan qurylysyna 11 mlrd 381,4 mln teńge bólindi.

Aqsaı qalasyndaǵy aýrýhana qurylysyn bıyl aıaqtaý kózdelip otyr. Al Kaztalov aýdany ortalyǵyndaǵy nysan aldaǵy jyly paıdalanýǵa berilmekshi.

y
Foto: BQO Qurylys basqarmasy

BQO densaýlyq saqtaý basqarmasy baspasóz qyzmetiniń naqtylaýynsha, Aqsaıdaǵy jańǵyrtylǵan aýdanaralyq aýrýhana Bórli, Shyńǵyrlaý, Syrym jáne Qaratóbe aýdandarynyń jalpy sany 102 415 turǵynyna medıtsınalyq kómek kórsetetin bolady. Bul shalǵaı eldi meken turǵyndary úshin mamandandyrylǵan medıtsınalyq qyzmetterdiń qoljetimdiligin arttyryp, kúrdeli jaǵdaılarda basqa medıtsınalyq uıymdarǵa barý qajettiligin azaıtýǵa múmkindik beredi.

y
Foto: BQO Qurylys basqarmasy

Kúni búgin Bórli aýdandyq aýrýhanasynda hırýrgııalyq, travmatologııalyq jáne laparoskopııalyq operatsııalar jasalady. Sondaı-aq kompıýterlik tomografııa (KT), ýltradybystyq zertteý (ÝDZ) jáne ehokardıografııa (EhoKG) qyzmetteri kórsetiledi.

Aldaǵy ýaqytta aýrýhanany odan ári damytý maqsatynda joǵary tehnologııalyq medıtsınalyq jabdyqtarmen qamtamasyz etý josparlanǵan. Atap aıtqanda, angıografııalyq júıe men magnıttik-rezonanstyq tomograf (MRT) ornatý kózdelip otyr. Bul kúrdeli dıagnostıkalyq zertteýler men medıtsınalyq kómektiń jańa túrlerin aýdan deńgeıinde kórsetýge jol ashady.

Joba boıynsha eki qosymsha ǵımarattyń qurylysy qarastyrylǵan. Onyń biri – perzenthana bólimi, ekinshisi – klınıkalyq-dıagnostıkalyq bólim. Perzenthana ǵımaraty tehnıkalyq qabaty men jertólesin qosa alǵanda eki qabatty bolyp salynady. Al statsıonar ǵımaratynyń artqy jaǵynda jertóle jáne tehnıkalyq qabaty bar, eki bólimge arnalǵan qosymsha korpýs boı kóteredi.

Jańa ǵımarattardyń jalpy aýdany – 8 myń sharshy metr.

Jobada medıtsınalyq nysannyń úzdiksiz ári qaýipsiz jumys isteýin qamtamasyz etetin ınjenerlik ınfraqurylym da qamtylǵan. Atap aıtqanda, jeke dızeldi elektr stantsııasy, blokty-modýldik qazandyq, derbes ottegi stantsııasy jáne árqaısysynyń syıymdylyǵy 30 tekshe metr bolatyn eki aǵyndy sý rezervýaryn salý kózdelgen.

v
Foto: BQO Qurylys basqarmasy

Densaýlyq saqtaý basqarmasynyń málimetine qaraǵanda, «Aýyldyq densaýlyq saqtaýdy jańǵyrtý» ulttyq jobasy aıasynda jańǵyrtylyp jatqan Kaztalov aýdandyq aýrýhanasy qurylys jáne rekonstrýktsııa jumystary aıaqtalǵannan keıin Kaztalov, Bókeı ordasy, Jańaqala jáne Jánibek aýdandarynyń turǵyndaryna (78 257 adam) medıtsınalyq kómek kórsetetin bolady.

y
Foto: BQO Qurylys basqarmasy

Joba aıasynda aýrýhananyń tósek qory 60-tan 100 tósek-orynǵa deıin ulǵaıtylady. Medıtsınalyq kómektiń jańa baǵyttary ashylyp, aýrýhana zamanaýı jabdyqtarmen jáne qajetti medıtsınalyq ınfraqurylymmen qamtamasyz etiledi.

- Jańǵyrtýdan keıin Kaztalovtaǵy aýrýhanada terapııalyq, hırýrgııalyq, bosandyrý, juqpaly aýrýlar, pedıatrııa bólimsheleri jumys isteıdi. Sonymen qatar jańadan ınsýlt bólimshesi, kardıologııalyq bólimshe, travmatologııa jáne ortopedııa baǵyty ashylyp, medıtsınalyq ońaltý qyzmeti keńeıtiledi, - dep habarlady BQO densaýlyq saqtaý basqarmasynan.

a
Foto: BQO Qurylys basqarmasy

Eske sala keteıik, budan buryn Aqtóbe oblysynda úsh aýdandaǵy aýrýhanaǵa japsarlas ǵımarat salynyp jatqanyn jazǵan edik.