BQO-da qaıtarylǵan aktıvter esebinen 27 joba júzege asyrylyp jatyr
ASTANA. KAZINFORM – Áleýmettik nysandar salý jáne rekonstrýktsııalaý jónindegi Prezıdent tapsyrmasyn júzege asyrý aıasynda Batys Qazaqstan oblysynda 27 jobany iske qosýǵa Arnaýly memlekettik qordan 17,7 mlrd teńge bólindi. Bul týraly Úkimettiń baspasóz qyzmeti habarlady.
Memleket basshysynyń tapsyrmasyna sáıkes jumystar júrgizilip jatyr. Negizgi mindetter – halyqty sapaly aýyz sýmen 100% qamtamasyz etý jáne aýyldaǵy densaýlyq saqtaý júıesin jańǵyrtý. Arnaýly memlekettik qordan barlyǵy 27 jobany júzege asyrýǵa 17,7 mlrd teńge bólingen.
Júzege asyrylyp jatqan jobalardyń ishinde 11 sýmen qamtý jobasy bar, olardyń iske qosylýy aýyldyq eldi mekenderdi sapaly aýyz sýmen qamtýdy keńeıtip, halyqtyń ómir súrý sapasyn jaqsartýǵa múmkindik beredi.
Sondaı-aq 16 joba aýyldyq jerlerde alǵashqy medıtsınalyq-sanıtarııalyq kómekti damytýǵa baǵyttalǵan. Olardyń qatarynda Syrym, Aqjaıyq, Bórli, Jańaqala jáne Báıterek aýdandarynda feldsherlik-akýsherlik pýnktter, dárigerlik ambýlatorııalar men medıtsınalyq pýnktter qurylysy bar.
Jańa densaýlyq saqtaý nysandarynyń ashylýy aýyl turǵyndaryn bilikti medıtsınalyq kómekpen qamtamasyz etip, aýdandyq aýrýhanalardaǵy júktemeni azaıtady.
Qazir Batys Qazaqstan oblysynda 15 joba tolyq aıaqtalǵan. Jyl sońyna deıin taǵy 10 nysan paıdalanýǵa beriledi, al qalǵan ekeýin 2026 jyly aıaqtaý josparlanyp otyr.
Aıta keteıik, Qaraǵandy oblysynda qaıtarylǵan aktıvter esebinen 51 medıtsınalyq nysan salyndy.
Kókshetaýda qaıtarylǵan aktıvter esebinen jańa sport kesheni salynyp jatyr.