BQO-da qaı ózenderden eldi mekenderge qaýip tónýi yqtımal
ORAL. KAZINFORM – Batys Qazaqstan oblysy aýmaǵynda tasqyn kezinde ózenderdegi sý deńgeıine boljam jasaldy.
«Qazgıdromet» RMK BQO fılıalynyń dırektory Tilegen Shapanovtyń málim etkenindeı, óńirdegi birqatar ózennen eldi mekenderge qaýip tónýi yqtımal.
Atap aıtqanda, Qaraózende tasqyn 17-23 naýryz aralyǵynda bolyp, sý deńgeıi Kaztalov aýdany Jalpaqtal aýyly janynda 636-876 santımetr aralyǵynda (qaýipti shegi – 820 sm) bolýy múmkin.
- Shaǵan ózeni 18-23 naýryz aralyǵynda Báıterek aýdany Chývashın aýyly tusynda 952-1 234 sm-ǵa (qaýipti shegi – 1 300 sm) deıin kóteriledi dep boljanyp otyr. Budan Báıterek aýdany eldi mekenderi men Oral qalasyna qaýip tónýi yqtımal, - dedi T.Shapanov.
Onyń aıtýynsha, Derkól ózeni Tasqala jáne Báıterek aýdandarynyń aýmaǵymen ótetini belgili. Munda sý deńgeıiniń joǵary shegi 16-20 naýryzǵa tap kelip, Tasqala aýylynda 515-645 sm (qaýipti shegi – 550 sm), Báıterek aýdany Beles eldi mekeninde 575-813 sm (700 sm) aralyǵynda bolýy múmkin. Sonymen qatar Tasqala aýdanynda 1-Shejin, 2-Shejin, Báıterekte Bykovka ózenindegi tasqyn saldarynan sol mańdaǵy eldi mekenderdi sý basý qaýpi joǵary bolyp otyr.
«Qazgıdromet» RMK málimetine sáıkes naýryz aıynyń ortasha aılyq temperatýrasy -2,9+2,1 gradýs shamasynda bolmaq, bul normadan 1° joǵary (norma: -3,9+1,1°S).
Jaýyn-shashynnyń aılyq mólsheri oblystyń basym bóliginde normadan kóp. Al oblystyń shyǵysynda norma shamasynda (norma: 14-27 mm). Birinshi onkúndiktiń ortasy men ekinshi onkúndiktiń basy jaýyn-shashyndy (jańbyr, jylbysqy qar) bolmaq. Jańbyr ekinshi onkúndiktiń ortasynda jáne úshinshi onkúndiktiń sońynda boljanady.
Eske sala keteıik, budan buryn Batys Qazaqstanda sý tasqynynan keler qaýip qandaı ekendigin jazǵan bolatynbyz.
Sý tasqynyna daıyndyq barysynda BQO-nyń birqatar aýdanynda tehnıkalar sany sáıkes bolmaı otyr.
BQO ózenderinde muz jarý jumystary júrgizilip jatyr.