BQO-da qaýipti qaldyq tókken kompanııa múddesin jaqtaǵan sheneýnik qyzmetinen bosatyldy

ORAL. QazAqparat - BQO tabıǵat qorǵaý prokýratýrasynyń usynysyn qaraǵan QR Energetıka mınıstrligi memlekettik qyzmetke kir keltiretin teris qylyq jasaǵany úshin Batys Qazaqstan oblystyq bas memlekettik ekologııalyq ınspektory E.Saparovty qyzmetinen bosatty.

BQO prokýratýrasynyń baspasóz qyzmetinen túsken málimetke qaraǵanda, E.Saparov QR Ekologııa kodeksiniń talaptaryn birneshe ret buza otyryp, belgilenbegen jerlerge qaýipti óndiristik qaldyqtardy tókken «Grın Aqsaı» JShS-ǵa qatysty shara qabyldamaǵan. E.Saparovtyń óndiris qaldyqtarynyń zańdy túrde saqtalyp otyrǵandyǵy jáne «Grın Aqsaı» JShS tarapynan ekologııalyq zańnamany buzýshylyqtyń oryn almaǵandyǵy týraly qorytyndysy QR Energetıka mınıstrligi Munaı-gaz keshenindegi ekologııalyq retteý, baqylaý jáne memlekettik ınspektsııa komıteti mamandarymen negizsiz dep tanyldy. Sóıtip onyń atalǵan JShS-nyń múddesin jaqtaǵany belgili boldy.

BQO prokýratýrasy «Grın Aqsaı» JShS-nyń ekologııalyq zańnamany buzýshylyqty jalǵastyrýyna baılanysty onyń qyzmetin toqtatý máselesin qoıǵanymen, E.Saparov tıisti sharany qabyldaǵan joq.

Tek prokýratýra organdarynyń aralasýynan keıin ǵana BQO boıynsha ekologııa departamenti JShS qyzmetin toqtatý týraly talap-aryz berýge májbúr boldy.

BQO mamandandyrylǵan aýdanaralyq ekonomıkalyq sotynyń sheshimimen departamenttiń «Grın Aqsaı» JShS qyzmetin toqtatý týraly talaby qanaǵattandyryldy.  BQO sotyń apellıatsııalyq sot alqasynyń qaýlysymen bul talap óz kúshinde qaldy. Sot aktisi zańdy kúshine endi.

Osylaısha E.Saparov memlekettik qyzmetke kir keltiretin teris qylyqtarǵa baryp, sonyń ishinde sheshim qabyldaý kezinde «Grın Aqsaı» JShS-ǵa zańsyz artyqshylyq kórsetken, ıaǵnı «Memlekettik qyzmet týraly» QR Zańy 50-baby 1-bóligi 4-tarmaǵyna qosa ekologııalyq zańnamanyń negizgi talaptary (kodekstiń 5-baby 2, 4, 5, 6, 7-tarmaqtary) buzylǵan.