BQO-da qatty jeldiń saldarynan 10 jasar qyz emhanaǵa tústi
ORAL. QazAqparat - Batys Qazaqstan oblysynda kúshti jelden shatyrlar ushyp, aǵashtar qulap jatyr, dep habarlaıdy QazAqparat tilshisi.
Búgin saǵat 16.00 shamasynda Terekti aýdanynyń ortalyǵy Fedorov aýylyndaǵy «Dımar» saýda ortalyǵynyń shatyry qulady. Ǵımaratta dárihana da ornalasqan. Shatyr qulaǵan kezde sol mańda adamdar bolmaǵan. Keıin saýda ortalyǵynyń mańy qorshalyp, tıisti qaýipsizdik sharalary alyndy.
Zelenov aýdany ıAnaıkın aýylynda tórt úıdiń qora-qopsysy men qystan qalǵan shópteri janyp ketti. Úıdiń tóńiregin tazalap, qoqysyn órtegen turǵyn qatty jeldi eskermegen. Aýyldyq okrýg ákimi Isataı Muǵalbaevtyń aıtýynsha, kelgen shyǵyn eseptelýde.
Búgin Oral qalasynda da oqys oqıǵa boldy. Kóshelerde baǵdarshamdar men terekter, jarnama qalqandary qulady.
Oral-Atyraý kúre joly boıyndaǵy «ORAL» degen jazýdyń eki árpi ushyp ketken.
Qalanyń birqatar aýdandarynda elektr jaryǵy bolmaı, qaıta jandy.
BQO TJ departamentiniń baspasóz qyzmeti osyndaı oqıǵalar jóninde málimetter jınaqtalyp jatqanyn jetkizdi.
BQO densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, Á.Áıtıev kóshesi boıynda ortalyq bazar aýdanynda jelden qaqpa ashylyp ketip, qyz balanyń basynan soqqan. Bul jóninde jedel járdem stansasyna saǵat 15.48-de qońyraý tústi. Bassúıek-mı jaraqatymen 2008 jylǵy qyz bala qalalyq kópbeıindi aýrýhanaǵa jetkizildi. Keıin ol ambýlatorlyq emdeýge úıine jiberildi.
Eske sala keteıik, óńirde jeldiń kúsheıetini jóninde keshe TJ departamenti eskertý jarııalaǵan bolatyn.
