BQO-da kásiporyndardyń zańsyz qyzmeti saldarynan memleketke 250 mln astam teńge zalal keltirilgen
ORAL. KAZINFORM — BQO boıynsha ekonomıkalyq tergep-tekserý departamenti jumysty is júzinde oryndamaı, qyzmetterdi kórsetpeı jáne taýarlardy tıep jóneltpeı, shot-faktýralardy jalǵan jazyp berýdi júzege asyrǵan adamdar tobynyń zańsyz qyzmetiniń jolyn kesti.
Departamenttiń baspasóz qyzmetinen málim etkenindeı, buǵan deıin de osyndaı qylmystary úshin sottalǵan uıymdastyrýshynyń 2023 jyldan bastap bógde adamdardyń atyna 2 kásiporyndy tirkegeni anyqtaldy. Bul rette kásiporyndar resimdelgen adamdar kásipkerlik qyzmetpen aınalyspaǵan.
Jalǵan shot-faktýralar jazylǵan qarajattyń jalpy aınalymy 900 mln teńgeden asty. Sonymen qatar býhgalterlik qujattarǵa sáıkes kásiporyndar armatýradan bastap bıtýmǵa deıingi taýarlarmen saýda jasaǵan, sondaı-aq is júzinde ıeliginde joq tehnıkalardy jalǵa berý boıynsha qyzmet kórsetken.
- Memleketke keltirilgen shyǵyn kásiporyndardyń kontragentteri tólemegen salyq túrinde 250 mln teńgeden asty. Tintý sharalarynyń nátıjesinde kásiporyndar qyzmetiniń zańsyz sıpatyn rastaıtyn mórler, fleshkalar, noýtbýk jáne býhgalterlik qujattar tabyldy. Qazirgi ýaqytta sotqa deıingi tergeý amaldary júrgizilýde. QR Qylmystyq is júrgizý kodeksiniń 201-babyna sáıkes tergeý múddesindegi ózge aqparat jarııa etýge jatpaıdy, - dep habarlady vedomstvodan.
Eske sala keteıik, budan buryn BQO turǵyny asa iri kólemde tsıfrlyq avtıvterdi zańsyz ótkizýmen aınalysqanyn jazǵan edik.
