BQO-da kásiporyn 74 qyzmetkeri joq dep kórsetip, 4 mln teńge jarna aýdarmaǵan
ASTANA. KAZINFORM – Batys Qazaqstan oblysynyń Shyńǵyrlaý aýdanynda kommýnaldyq kásiporyn 74 qyzmetkerge tıesili mindetti áleýmettik medıtsınalyq saqtandyrý jarnalaryn jáne ózge de tólemderdi aýdarmaǵan.
Shyńǵyrlaý aýdanynyń prokýratýrasy azamattardyń eńbek jáne áleýmettik quqyqtaryn qorǵaý salasynda zańnama talaptarynyń buzylǵanyn anyqtady.
Tekserý barysynda aýdandaǵy kommýnaldyq kásiporyn 2025 jyldyń IV toqsanyna arnalǵan salyq deklaratsııasyna jalǵan málimetter engizgeni belgili boldy. Atap aıtqanda, kásiporyn resmı qujatta qyzmetkerleri joq ekenin kórsetken.
Sonyń saldarynan 74 qyzmetkerge tıesili jalpy somasy 4 mln teńge bolatyn mindetti áleýmettik medıtsınalyq saqtandyrý jarnalary men zańnamada kózdelgen ózge de tólemder aýdarylmaǵan.
– Alaıda «Eńbek.kz» aqparattyq júıesiniń málimetterine sáıkes, kásiporynda 74 qyzmetker bar ekeni rastaldy. Prokýrorlyq qadaǵalaý sharalarynyń nátıjesinde anyqtalǵan zań buzýshylyqtar joıylyp, 74 qyzmetkerdiń quqyqtary qalpyna keltirildi, – delingen prokýratýra habarlamasynda.
Vedomstvo azamattardyń eńbek jáne áleýmettik quqyqtaryn qorǵaý prokýratýra qyzmetiniń basym baǵyttarynyń biri bolyp qala beretinin atap ótti.
Aıta keteıik, buǵan deıin Abaı oblysynda prokýratýranyń aralasýymen 185 jumyskerge tıesili 15 mln teńgeden astam mindetti zeınetaqy, áleýmettik jáne medıtsınalyq aýdarymdar tólengen edi.