BQO-da kásipkerdi aldaǵan memlekettik qyzmetshige 5 mln teńge aıyppul salyndy

ORAL. KAZINFORM – Oral qalalyq sotynda QR QK 190-baby 3-bóligi 2-tarmaǵyna sáıkes aıyptalǵan memlekettik qyzmetshige qatysty úkim shyqty. 

BQO sotynyń baspasóz qyzmetinen túsken málimetke qaraǵanda, joldy kúrdeli jóndeý jumystary boıynsha memlekettik satyp alý portalynda ashyq konkýrs oınatylatynyn estigen JShS dırektory qatysýǵa sheshim qabyldaǵan. 

Nátıjesinde memlekettik satyp alý portalynda baldyq eseptik kórsetkishke sáıkes jeńimpaz bolyp tanylǵan. Batys Qazaqstan oblysynyń jolaýshylar kóligi jáne avtomobıl joldary basqarmasy men atalǵan JShS arasynda kelisimshart jasalyp, shotyna avans jiberilgen.

«JShS dırektory kelisimshart boıynsha avanstyń qalǵan bóligi qashan túsetinin suraǵan kezde basqarmanyń bas mamany ýákiletti tulǵa bola otyryp, aldaý jolymen bótenniń múlkin jymqyrý maqsatyn kózdegen. Atap aıtqanda, kelisimshart negizinde avansty tóleý onyń qyzmettik mindetterine kirmeıtinin jáne oǵan yqpal jasaı almaıtynyn bile tura, óziniń qyzmet babyn paıdalanyp, avans bóligin tóleımin dep, 500 myń teńge suraǵan. Basqarmanyń bas mamany JShS dırektoryn aldap, «Kaspi Bank» AQ-daǵy shotyna aýdarǵan 500 myń teńgeni jymqyryp, alaıaqtyq jasaǵan. Sot otyrysy barysynda sottalýshy óz kinásin moıyndady. Sot QR QK 190-baby 3-bóliginiń 2-tarmaǵymen kináli dep tanyp, ómir boıyna memlekettik qyzmette laýazymdardy atqarý quqyǵynan aıyra otyryp, oǵan 5 mln teńge mólsherindegi aıyppul jazasyn kesti. Úkim zańdy kúshine endi», - dep habarlady vedomstvodan.

Eske sala keteıik, budan buryn dárigerdiń salǵyrttyǵynan BQO turǵyny aıaǵynan aıyrylǵanyn jazǵan bolatynbyz.