BQO-da kásipker 150 mln teńge sýbsıdııany jymqyryp, saýda úıi men saýna salǵan
ORAL. KAZINFORM – QR Qarjy monıtorıngi agenttigi BQO boıynsha departamenti nesıelik seriktestik basshysyna qatysty 150,7 mln teńge kólemindegi sýbsıdııany jymqyrý faktisi boıynsha tergeýdi aıaqtady.
Departamenttiń baspasóz qyzmetinen málim etkenindeı, kúdikti «Agrobıznes» nesıeleý baǵdarlamasy aıasynda baqylaýyndaǵy sharýa qojalyǵynyń atyna zańsyz túrde 126,7 mln teńge kóleminde jeńildetilgen nesıe rásimdegen.
Keıin bul qarajat iri qara mal satyp alynbastan, sharýa qojalyǵynyń shotynan qolma-qol aqshaǵa aınaldyrylǵan.
Sonymen qatar mal sharýashylyǵynyń aqparattyq júıesi bazasyna jalǵan aqparat engizý arqyly ol 2017-2021 jyldarǵa arnalǵan agroónerkásiptik keshendi damytý jónindegi ulttyq joba aıasynda bólingen 24 mln teńge kólemindegi sýbsıdııany zańsyz alǵan.
Sýbsıdııany zańdy dep kórsetý maqsatynda ol basqa sharýa qojalyqtarynan asyl tuqymdy sıyr satyp aldy degen jalǵan qujattardy tapsyrǵan.
- Qylmystyq jolmen alynǵan tabysqa kúdikti jer telimderin satyp alyp, olardyń birinde saýna men saýda úıin salǵan. Atalǵan múlikti jasyrý maqsatynda ony týysynyń atyna rásimdegen. Sot sanktsııasymen jalpy quny 198 mln teńge bolatyn múlikke - 2 jer telimine, saýda úıine, saýnaǵa jáne «Exeed LX» markaly avtokólikke tyıym salyndy. Kúdiktige qatysty qamaýǵa alý túrinde bultartpaý sharasy qoldanyldy, - dep habarlady vedomstvodan.
Eske sala keteıik, budan buryn BQO-da 14 mln teńgeni zańsyz ıemdengen alaıaqtyń isi sotqa joldanǵanyn jazǵan edik.