BQO-da kásiporyn dırektory jumyssyzdarǵa beriletin nesıe boıynsha 18 mln teńge alǵan
BQO prokýratýrasynyń baspasóz qyzmetinen túsken málimetke qaraǵanda, sońǵy úsh jylda jumyspen qamtý ortalyqtary arqyly 3 933 adam qysqa merzimdi kásibı oqýǵa jiberilip, sol úshin bıýdjetten 625,9 mln teńge bólingen.
Alaıda solardyń 1 131-i nemese 28 paıyzy ǵana jumysqa ornalasty, onyń 300-den astamy mamandyǵy boıynsha jumys istemeıdi.
Tekseris nátıjesinde jumyspen qamtý málimetin jasandy túrde asyra kórsetip, jumyssyzdar sanyn tómendetýge qatysty 61 derek anyqtaldy. Mysaly, eńbekpen qamtýdyń jeke kartasyna sáıkes 2017 jylǵy 1-30 maýsym aralyǵynda F. degen jumyssyz ýaqytsha qoǵamdyq jumysqa ornalasty delinip, jumyssyzdar esebinen shyǵarylǵan. Áıtse de ol jumysqa ornalaspaǵan, qoǵamdyq jumysqa tartý týraly kelisimshart jasalmaǵan, eńbekaqy, zeınetaqy jáne áleýmettik aqylary tólenbegen.
Oǵan qosa qoǵamdyq jumys oryndaryna jalǵan ornalastyrýdyń 11 deregi anyqtaldy. Aıtalyq, H. degen azamat aýdandyq jumyspen qamtý ortalyǵynda jumyssyz retinde tirkelip, jyl basynda aýyldyq okrýg ákimdigi apparatyna qoǵamdyq jumysqa jiberilip, sol jerde 6 aı boıy «jumys istegen». Shyn mánisinde ol osy merzimde Aqtaý qalasyndaǵy kásiporynda eńbek etken.
Sonymen qatar tekserý jekelegen adamdarǵa nesıeniń negizsiz berilgenin kórsetti. Atap aıtqanda, N. degen azamat kásiporyn dırektory bola tura, ózin-ózi qamtýshy esebinde Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyna qatysýshy retinde tirkelgen. Osylaısha ol memlekettik qoldaý aıasynda 18 mln teńge nesıe alǵan.
Sol sekildi B. esimdi jeke kásipker áleýmettik jumys oryndaryn ashý úshin 9 márte zańsyz nesıe alǵan. Іs júzinde ol áleýmettik jumys ornyn ashpaǵan bolyp shyqty.
Barlyǵy 100-ge jýyq zańbuzýshylyq boıynsha olardy joıý jáne kináli laýazymdy qyzmetkerlerdi jaýapqa tartý maqsatynda prokýrorlyq yqpal etý aktileri engizildi.
Prokýrorlar 12 derek boıynsha sotqa deıingi tergep-tekserýdi bastady.