BQO-da kásipodaq uıymdaryna túsken 800-den astam ótinishtiń basym bóligi sheshimin tapty
Bıylǵy birinshi jartyjyldyqtaǵy atqarylǵan jumystar boıynsha esep bergen BQO kásipodaqtar ortalyǵynyń tóraǵasy Aıgúl Esekenovanyń málim etkenindeı, ótinishter negizinen eńbek zańnamasyna qatysty, materıaldyq kómek kórsetý, jalaqy, bilikti arttyrý máseleleri boıynsha boldy.
Ásirese, álemdi jaılaǵan pandemııa elimizdegi eńbek salasyna edáýir ózgerister men turaqsyzdyqtar ákeldi. Sondyqtan osy ýaqyt aralyǵynda kásipodaq qyzmetine júginýshiler sany artyp, ózderiniń quqyqtaryn qorǵaýǵa nıettiler kóbeıdi.
«Bıylǵy birinshi jartyjyldyqta kásipodaqqa kelip túsken ótinishterdiń kóbi kelisim komıssııalarynyń jumysy týraly, ujymdyq sharttardaǵy ózgerister jáne zııandy eńbek jaǵdaılary úshin tólem jóninde boldy. Jyl basynan beri bilim jáne ǵylym, densaýlyq saqtaý, memlekettik qyzmet, mádenıet jáne sport salasy boıynsha 33 eńbek ujymymen kezdesý ótkizilip, eńbek qatynastary máselelerine monıtorıng jasaldy. Nátıjesinde 800-den astam kásipodaq múshesin biriktirgen 9 jańa bastaýysh uıym óz jumysyn bastady», dedi Aıgúl Orazqyzy.
Onyń sózine qaraǵanda, oblystaǵy kásipodaq uıymdarynyń quramyn jaqsartý boıynsha birqatar jumystar júrgizilýde. Kúni búgin BQO kásipodaqtar ortalyǵy 10 salalyq jáne 14 jergilikti, 1 myńǵa jýyq bastaýysh kásipodaq uıymdaryn jáne 73 myńnan astam kásipodaq múshelerin biriktirip otyr. Sonyń ishinde 20 814-i 35 jasqa deıingi jastar bolsa, 42 869-y – áıelder.
Bıyl BQO ákimdigi, jumys berýshilerdiń oblystyq birlestikteri jáne kásipodaqtar arasynda 2021-2023 jyldarǵa arnalǵan oblystyq kelisimge qol qoıylyp, bul úsh taraptyń birlesip jumys júrgizetin basty qujattarynyń birine aınaldy.
Óńirde áleýmettik áriptestik jáne áleýmettik-eńbek qatynastaryn retteý jónindegi úshjaqty komıssııalarynyń otyrystarynda kásiporyndardaǵy eńbek qatynastary máselelerin keshendi qaraý tájirıbesi jolǵa qoıylǵan. Kúni búginge deıin ár deńgeıdegi úshjaqty komıssııalardyń 34 otyrysy (jeteýi – oblystyq) ótkizilip, kókeıkesti máseleler talqylandy.
«Eńbek qatynastarynyń ózektiligin eskere otyryp, oblystyq úshjaqty komıssııa quramy qaıta qaralyp, oǵan oblys ákimdiginiń 2021 jylǵy 23 shildedegi №142 qaýlysyna sáıkes iri jumys berýshiler engizildi. Oblys ákimi tóraǵa bolyp taǵaıyndaldy. Oblysta eńbek táýekelderi kartasyna eńbek daýy týyndaý yqtımaldylyǵy bar 16 kásiporyn engizilse, qazir olardyń bárinde jaǵdaı turaqty. Óńirdegi eńbek salasyndaǵy áleýmettik máseleler budan bylaı da kásipodaqtar baqylaýynda bola bermek», dedi A.Esekenova.