BQO-da kásipkerlerge 6 paıyzben nesıe berilmek

ORAL. QazAqparat - Batys Qazaqstan oblysynda bıyl 2017-2021 jyldarǵa arnalǵan Nátıjeli jumyspen qamtýdy jáne jappaı kásipkerlikti damytý baǵdarlamasy aıasynda 300,3 mln teńge nesıe berilmek, dep habarlaıdy QazAqparat tilshisi.

BQO kásipkerlik jáne ındýstrıaldyq-ınnovatsııalyq damý basqarmasynyń basshysy Arman Jalmaǵambetovtiń aıtýynsha, nesıeler ekinshi deńgeıli bankterden 6 paıyzben beriledi.

Jyl basynan beri 213,3 mln teńgeni quraıtyn 14 nesıe berildi.

Ótken jyly 315,5 mln teńgeni quraıtyn 29 shaǵyn nesıe úlestirilse, sonyń 21-i (233,5 mln teńge) - start-ap jobalar.
 

Jalpy, oblysta 48 myńnan astam shaǵyn jáne orta kásipkerlik nysandary tirkelse, sonyń 37 myńy jumys jasap tur. Olarda 111 myńǵa jýyq adam eńbek etýde.

Memleket basshysy shaǵyn kásipkerlik kásiporyndarynyń ishki aınalym ónimindegi úlesin 2050 jylǵa deıin 50 paıyzǵa deıin jetkizý tapsyrmasyn alǵa qoıǵany málim. 2016 jyldyń qorytyndysymen onyń úlesi óńirde 41,9 paıyzǵa jetti. Bul jóninen oblys respýblıka boıynsha kósh basynda tur.

«Bıznestiń jol kartasy - 2020» baǵdarlamasy júzege asyryla bastaǵannan beri kásipkerlerdiń 99,1 mlrd teńgeni quraıtyn 831 jobasy memlekettik qoldaýǵa ıe boldy. Oǵan qosa 2,7 mlrd teńge bolatyn 57 joba jetispeı turǵan ınfraqurylymmen qamtamasyz etildi. Bul 28,2 myń jumys ornyn saqtaýǵa jáne jańadan 5 myńnan astam jumys ornyn ashýǵa múmkindik berdi.

«Sońǵy eki jylda aýyl kásipkerleriniń baǵdarlamaǵa qyzyǵýshylyǵy artqanyn atap ótýge bolady. Aýyldyq jerlerden barlyǵy 36 mlrd teńgeni quraıtyn 328 joba maquldansa, sonyń 81-i (7,4 mlrd teńge, qoldaý tapqan jobalar sanynyń 44 paıyzy) ótken jyldyń úlesine tıedi», dedi A.Jalmaǵambetov.