BQO-da kásipkerlerge 294,7 mln teńge shaǵyn nesıe berý kózdelýde
ORAL. QazAqparat - Batys Qazaqstan oblysynda bıyl «Damý» kásipkerlikti damytý qory» AQ arqyly qalalyq jerde 294,7 mln teńge shaǵyn nesıe berý kózdelýde, dep habarlaıdy «QazAqparat» tilshisi.
«Damý» kásipkerlikti damytý qory» AQ óńirlik fılıalynyń dırektory Erbol Idenovtiń málim etkenindeı, sonymen qatar kepildeme berýge 36 mln teńge qarastyrylǵan. Ekinshi deńgeıli bankten nesıe alý barysynda kepildeme jetispese, kásipker sýbsıdııalaý baǵdarlamasy arqyly qordyń kepildemesin ala alady. Turaqty jumys jasaıtyn kásipker bankke qoıǵan kepildemesiniń qunynan eki ese artyq mólsherde nesıege qol jetkize alady. Al kásibin jańa bastaǵandar nesıeniń 85 paıyzyna deıingi kólemde kepildikke ıe bola alady. Bıylǵy birinshi jartyjyldyqta jalpy somasy 490,8 mln teńgege 24 kepildik berildi.
Ótken jyly Batys Qazaqstan oblysynda barlyǵy 20,4 mlrd teńgege 111 sýbsıdııalaý kelisimshartyna qol qoıyldy. Al bıylǵy alty aıda 8 mlrd 123,7 mln. teńge nesıeni quraıtyn 69 joba boıynsha kelisim jasaldy. Jalpy, sýbsıdııalaý baǵdarlamasy júzege asyryla bastaǵannan beri 86,7 mlrd teńge nesıeni quraıtyn 603 joba maquldandy.
Aıta keteıik, qor sonymen qatar 2016 jyldan beri «Jańa bıznesti ashýdy qoldaý» jobasyn júzege asyrýda. Osyǵan oraı ótken jyly 86 kásipker bilimin kóterse, bıylǵy alty aıda 43 adam oqydy. Kásipkerlerge qyzmet kórsetý ortalyǵy da óńirde osy salanyń damýyna septigin tıgizip keledi. Bul ortalyq arqyly 2016 jyly turǵyndar men óz isin jańa bastaǵandarǵa 4 myńnan astam, bıyl 2734 qyzmet kórsetilip, keńes berildi.
