BQO-da kásipkerdi óltirgen kúdiktilerge izdeý jarııalandy
QazAqparat budan buryn jazǵanyndaı, qandy oqıǵa keshe keshkisin Oraldaǵy P.Atoıan stadıony mańynda bolyp, birneshe pyshaq jaraqatyn alǵan er adam qaza tapqan edi.
BQO polıtsııa departamentiniń baspasóz qyzmetinen málim etkenindeı, qazirgi kezde asa aýyr qylmys jasaǵany úshin 1991 jylǵy Rýslan Qojantaev pen 2001 jylǵy Turlan Amangeldi izdestirilip jatyr.
Bul ekeýi keshe shamamen saǵat 19.55-te Isataı-Mahambet kóshesi 15-mekenjaıy tusynda kisi óltirgen soń izderin sýytqan.
«Qazirgi kezde kúdiktilerdi izdestirýge BQO departamentiniń barlyq kúsh-quraly jumyldyrylǵan. Olardyń bolýy múmkin jerleri anyqtalýda. Atalǵan qylmys departament basshylyǵynyń aıryqsha baqylaýynda. Eger kúdiktilerdiń qaıda ekeni týraly aqparat biletin adamdar bolsa, 102 nemese 8-711-2-98-45-30 telefonyna qońyraý shalýlary suralady», dep habarlady vedomstvodan.
Áleýmettik jelide sondaı-aq oqıǵa bolǵan jer túsip qalǵan beınejazba tarap ketti. Onda qashyp kele jatqan eki adam (bireýiniń eki qoly qan) anyq kórinedi.