BQO-da qarjy pıramıdasyn quryp, salymshylardan 76 mln teńge túsirgen áıel ustaldy
BQO boıynsha ekonomıkalyq tergeý departamentiniń baspasóz qyzmeti málim etkenindeı, qazirgi kezde A. degen áıelge qatysty QR QK 217-babyna (qarjylyq (ınvestıtsııalyq) pıramıdany qurý jáne oǵan basshylyq etý) sáıkes tergeý amaldary júrgizilýde.
Atalǵan áıel qarjy pıramıdasyn quryp, «Halyq bank» jáne «Kaspıı bank» AQ-daǵy kartalyq esepshottaryna «Mebelnyı proekt Nýr» onlaın jobasy arqyly jıhaz oınatý jolymen jeke tulǵalardan qarjy jınaǵan. Jańa salymshylardy da tartyp otyrǵan.
Aldyn ala málimet boıynsha 2700-den astam salymshydan qarjy pıramıdasyna 76 mln 75 myń teńge túsirgen.
Qazirgi kezde kúdikti QR Qylmystyq is júrgizý kodeksi 128-babyna sáıkes Oral qalasy polıtsııa basqarmasynyń ýaqytsha ustaý ızolıatoryna qamaldy.
«Ádette jeke tulǵalardyń qarjy pıramıdasyna bergen salymdary eshteńemen qamtamasyz etilmegen. Tólemder jańa salymshylardy tartý jolymen júzege asyrylady. Qolda bar derekterge qaraǵanda, Qazaqstan aýmaǵynda osyndaı jolmen birneshe saıt qyzmet etedi. Olardyń uıymdastyrýshylary elden tysqary jerde ornalasqan. Eger qarjy pıramıdasyna aldansańyz, BQO boıynsha ekonomıkalyq tergeý departamentiniń +7(7112)53-84-27 senim telefonyna habarlasýǵa bolady», dep habarlady vedomstvodan.
Eske sala keteıik, budan buryn Oralda jol tártibin 84 ret buzǵan júrgizýshige 1,2 mln teńge aıyppul salynǵanyn jazǵan bolatynbyz.