BQO-da qarjy bólýge qatysty otyrystar jarııaly túrde ótpekshi
ORAL. QazAqparat - Oblys ákimi Altaı Kólginov ashyqtyq pen jarııalylyqty qamtamasyz etý maqsatynda BQO boıynsha óńirlik úılestirý keńesi (kásipkerler úshin sýbsıdııalar men granttar bólý) men agroónerkásip kesheni boıynsha sýbsıdııalaý komıssııalarynyń otyrystaryn oblys ákimdiginiń resmı saıtynda onlaın kórsetý týraly tapsyrma berdi, dep habarlaıdy «QazAqparat» tilshisi.
Oblys ákiminiń baspasóz qyzmetinen túsken málimetke qaraǵanda, bul bastama oblys ákiminiń bıylǵy turǵyndar aldyndaǵy esebi kezinde kóterilgen bolatyn. «Kásipkerler men turǵyndar jobalardy qarjylandyrý men sýbsıdııalar bólinisinen habardar bolýy qajet. Halyq arasynda kúdik týdyratyn, adamı qarym-qatynastar bar otyrystardyń barlyǵy da onlaın rejım arqyly taratylýy kerek. Memleketten bólinip otyrǵan qarjynyń jumsalýyn halyq bilip otyrýy tıis,» degen edi Altaı Kólginov.
Aıta keteıik, bul qadam Batys Qazaqstan oblysy ákimdigi, prokýratýra jáne sybaılas jemqorlyqqa qarsy is-qımyl ulttyq bıýrosy arasynda jemqorlyqtyń aldyn alý baǵytynda ázirlengen jumys josparyna sáıkes qolǵa alynyp otyr.
