BQO-da qarjylyq pıramıdalardan 1 myńnan astam turǵyn zardap shekken

ORAL. KAZINFORM – BQO boıynsha ekonomıkalyq tergep-tekserý departamentimen bıylǵy jyl basynan beri 23 qylmystyq quqyq buzýshylyq tirkeldi.

Departament basshysynyń orynbasary Jandos Kenjebaevtyń óńirlik kommýnıkatsııalar qyzmeti alańynda ótken brıfıngte málim etkenindeı, quqyq buzýshylyq saldarynan keltirilgen zalal kólemi 2 mlrd teńgeden asqan. Al zań buzýshylar qylmystyq jolmen 1,3 mlrd teńge paıda tapqan.

Jyl basynan beri 36 qylmystyq is óndiriste bolsa, 17-si boıynsha sotqa deıingi tergeý aıaqtaldy. Asa iri kólemde bıýdjet qarajatyn jymqyrý derekteri boıynsha birqatar is qazirgi kezde sotta qaralyp jatyr.

- Azamattardy qarjylyq pıramıdadan qorǵaý máselesine erekshe toqtalǵym keledi. Qarjylyq monıtorıng organdary qabyldaǵan sharalarǵa qaramastan, adamdar kúdikti kásiporyndarǵa qarjy salýdy jalǵastyryp jatyr. Sońǵy úsh jylda departamentpen qarjylyq pıramıdalardy qurý deregi boıynsha 13 qylmystyq is tirkeldi. Jábirlenýshiler sany – 1 myńnan astam, olar – oblys turǵyndary. Keltirilgen zalal 1,1 mlrd teńgeden asady. Sonyń ishinde 9 is boıynsha aıyptaý úkimi shyǵarylsa, qalǵandary óndiriste, - dedi J.Kenjebaev.

Onyń aıtýynsha, sonymen qatar salymshylardan alynǵan 76 mln astam teńge kólemindegi kiristerdi zańdastyrý derekteri anyqtaldy. Osy oraıda aıyptalýshylardan 113 mln teńgeniń múlki tárkilendi.

Departament basshysynyń orynbasary qarjylyq pıramıdany uıymdastyryp, oǵan basshylyq etkeni úshin ǵana emes, QR QK 217-babyna sáıkes jarnama jasaǵany úshin de qylmystyq jaýapkershilik qarastyrylǵanyn jetkizdi. Jarnama jasaǵan adam quqyq buzýshylyqtyń aýyrlyǵyna qaraı iri kólemde aıyppul salýǵa jáne 4 jylǵa deıingi bas bostandyǵynan aıyrýǵa jazalanady.

- Bıyl qarjylyq pıramıdany jarnama jasaý deregi boıynsha 1 is tirkeldi. Sondaı-aq «Kıberqadaǵalaý» júıesi arqyly 545 saıt pen WhatsApp jelisindegi 957 qatysýshysy bar chat joıyldy. Sol sekildi zańsyz oıyn bıznesi de oǵan qatysýshylarǵa orasan zor zııanyn tıgizedi. Internettiń damýymen jastar jelide oınaýǵa kóshti. Buǵan jol bermeý úshin saıttar men betterdi buǵattaý baǵytynda sharalar qabyldanyp jatyr. Bıyldyń ózinde 275 saıt buǵattalyp, 7 adam ákimshilik jaýapkershilikke tartyldy, - dep qosty J.Kenjebaev.

Eske sala keteıik, budan buryn BQO-da kitaphana esepshileri memleketke 46 mln teńgege jýyq zalal keltirgenin jazǵan edik.