BQO-da káriz sýy nelikten qoqys alańyna tógilip jatyr — ákimdik jaýap berdi
ORAL. KAZINFORM — Batys Qazaqstan oblysy Báıterek aýdany Darııan aýylynda káriz sýynyń qoqys alańyna tógilip jatqany jóninde beınejazba tarady.
Qoǵam belsendisi Almagúl Iqsanovanyń Instagram áleýmettik jelisinde málim etkenindeı, Darııanda quny 250 mln teńge turatyn kárizdik tazartý qondyrǵysy jýyrda, 2025 jyly 31 jeltoqsanda iske qosylǵan. Soǵan qaramastan, osyndaı jaǵdaıǵa jol berilip otyr.
— Mine, assenızator kólikteri káriz sýyn qoqys alańyna, ashyq dalaǵa tógip jatyr. Bul sonshama qarjynyń jelge ushqany ma? Eger nysan tıisinshe jumys istemese, bıýdjet qarajaty ne úshin jumsalǵan? Jaýapty organdar qaıda qarap otyr? Tabıǵat qorǵaý qyzmeti, jer ınspektsııasy, prokýratýra jáne jergilikti atqarýshy organdar tarapynan baqylaý qaıda? Tıisti tazartýsyz jáne ekologııalyq ruqsatsyz ashyq jerge qaldyq pen káriz sýynyń tógilýi durys emes dep sanaımyz, — dedi Almagúl Iqsanova.
Júrgizýshiler de óz sózinde kárizdik tazartý qondyrǵysynyń jabyq turǵanyn keltirgen.
Osyǵan oraı Kazinform tilshisi Báıterek aýdany ákimdigine arnaıy saýal joldaǵan edi.
Ákimdik málimetine qaraǵanda, Darııan aýylyndaǵy kárizdik tazartý qondyrǵysy bastapqyda iske qosý-retteý jaǵdaıynda jumys istegen. Qazirgi tańda iske qosý-retteý jumystary aıaqtalý qarsańynda. Nysan shtattyq rejımde qyzmet etip tur, tazartýdyń tehnologııalyq protsesteri tolyq kólemde qamtamasyz etilgen. Jabdyq jumysy jobalyq parametrler men ekologııalyq talaptarǵa saı keledi.
— Nysannyń paıdalanylýyna qosymsha taldaý jasaldy. Sonyń ishinde kárizdik sýdy quıyp alyp, tógetin assenızatorlyq tehnıkalar sanyna monıtorıng júrgizildi. Jumys barysynda assenızatorlyq mashınalardyń jekelegen júrgizýshileri káriz sýyn burynǵysha tógetini anyqtaldy. Ornatylǵan tártipten tys, bulaısha tógý eseptiń naqtylyǵyna áser etedi. Kúni búgin nysan jumysy qalypty uıymdastyrylǵan, zań buzý baıqalmaıdy, — delingen resmı jaýapta.
Eske sala keteıik, budan buryn BQO-da kompanııanyń mal ólekseleri men qaldyqtaryn aýyl mańyna tógip jatqanyn jazǵan edik.