BQO-da qarýdy zańsyz saqtaǵan turǵynǵa aıyppul salyndy
ORAL. QazAqparat - Batys Qazaqstan oblysynda qarýdy zańsyz saqtaǵan turǵynǵa aıyppul salyndy, dep habarlaıdy «QazAqparat» tilshisi.
BQO sotynyń baspasóz qyzmetinen túsken málimetke qaraǵanda, Bórli aýdandyq soty E. degen azamatqa qatysty QR Ákimshilik quqyqbuzýshylyq kodeksi 482-baby 1-bóligine sáıkes (ishki ister organdarynda tirkelmegen tegis uńǵyly qarýdy, onyń oq-dárisin zańsyz ıelený, berý, ótkizý, saqtaý, alyp júrý, tasymaldaý) ákimshilik iske núkte qoıdy.
Sotta anyqtalǵanyndaı, ótken jylǵy 4 jeltoqsanda saǵat 22.30 shamasynda polıtsııa qyzmetkerleri E-den saraptama qorytyndysyna sáıkes IJ-43 markaly 12 kalıbrli qos uńǵyly ańshy myltyǵy men 11 oq-dárini tapqan. Ony atalmysh azamat zańdy qujattarsyz saqtaǵan.
Sot qaýlysymen E-ge 20 AEK kóleminde aıyppul salynyp, qarý tárkilendi.
Qaýly zańdy kúshine engen joq.
Aıta keteıik, BQO ІІD baspasóz qyzmetiniń málimeti boıynsha 2017 jyly qarýdy óz erkimen tapsyrǵan oblys turǵyndaryna 8 mln teńge tólendi.
