BQO-da qarý men kıik múıizin zańsyz saqtaǵan sharýa qojalyǵynyń basshysy ustaldy

ORAL. KAZINFORM — Batys Qazaqstan oblystyq polıtsııa departamentini uıymdasqan qylmysqa qarsy kúres basqarmasy júrgizgen jedel izdestirý is-sharalary barysynda Tasqala aýdanynda zańsyz saqtalǵan qarý men kıik múıizderi tárkilendi.

BQO polıtsııa departamentiniń baspasóz qyzmetinen málim etkenindeı, sharýa qojalyqtarynyń birinde sanktsııalanǵan tintý júrgizilgen.

Tintý nátıjesinde tirkelmegen «Stechkın» avtomatty tapansha men onyń oqjatary, «Saıga-410K» úlgisindegi ózdiginen atylatyn tegis uńǵyly karabın, eki tirkelgen tegis uńǵyly myltyq, ártúrli kalıbrdegi 114 dana oq-dári, sondaı-aq tórt dana kıik múıizi anyqtalyp, tárkilendi.

- Zańsyz saqtalǵan barlyq qarý-jaraq pen kıik derıvattarynyń sharýa qojalyǵynyń 53 jastaǵy basshysyna tıesili ekeni belgili boldy. Kúdikti ustalyp, ýaqytsha ustaý ızolıatoryna qamaldy. Atalǵan derek boıynsha QR zańnamasyna sáıkes qylmystyq is qozǵalyp, tergeý amaldary bastaldy, - dep habarlady vedomstvodan.

Eske sala keteıik, budan buryn BQO-da aýyldyń eki turǵyny qarý jáne esirtki zattaryn zańsyz saqtaǵanyn jazǵan edik.