BQO-da kardıologııalyq ortalyqqa jyl saıyn 4 myńnan astam adam túsedi
ORAL. KAZINFORM – BQO-da kardıologııalyq ortalyqqa jyl saıyn orta eseppen 4 myńnan astam adam tússe, sonyń 60 paıyzdan astamy – jiti koronarlyq sındromy bar, 20 paıyzy – júrek jetkiliksizdigi bar naýqastar.
BQO densaýlyq saqtaý basqarmasy basshysynyń orynbasary Aınash Ǵubaıdýllınanyń óńirlik kommýnıkatsııalar qyzmeti alańynda ótken brıfıngide málim etkenindeı, júrektiń ıshemııalyq aýrýynyń órshýi kóbinese jiti koronarlyq sındrommen kórinedi. Bul – turaqsyz stenokardııa nemese mıokard ınfarktisin qamtıtyn, ómirge qaýip tóndiretin jaǵdaı.
Onyń sózine qaraǵanda, oblystyq kardıologııalyq ortalyqta joǵary tehnologııalyq kardıohırýrgııalyq kómek kórsetiledi. Mekeme qymbat qural-jabdyqtarmen qamtamasyz etilgen. Munda 2013 jáne 2023 jyldary satyp alynǵan 2 angıografııalyq qondyrǵy bar.
– Jiti koronarlyq sındromy bar patsıentter aımaqtandyrý kartasyna sáıkes, qashyqtyǵyna baılanysty reanımobıldermen jáne sanıtarııalyq avıatsııa arqyly oblystyq kardıologııalyq ortalyqqa jetkiziledi. Interventsııalyq kardıologtarmen qamtamasyz etilý deńgeıi – 92,3 paıyz. Oblystyq kardıologııalyq ortalyqtaǵy ınterventsııalyq qyzmet 2009 jyldan bastap táýlik boıy kórsetiledi. Qalalyq kópbeıindi aýrýhanada da koronarlyq angıografııa jáne stentteý júrgiziledi. Bul is-sharalar júrek-qan tamyrlary aýrýlarynan bolatyn ólim-jitimdi azaıtýǵa múmkindik beredi, - deıdi A.Ǵubaıdýllına.
BQO kardıologııalyq ortalyǵy dırektorynyń mindetin ýaqytsha atqarýshy Elmıra Súıeýǵazıevanyń naqtylaýynsha, jyl basynda óńirdegi halyq sany 695 791 adam bolsa, qan aınalymy júıesi aýrýlarymen 96 172 patsıent esepte turady.
Skrınıng gıpertonııa nemese joǵary holesterın sııaqty qaýip faktorlaryn sımptomdar paıda bolǵanǵa deıin anyqtaýǵa múmkindik beredi. 2025 jyly halyqty skrınıngpen qamtý 100 paıyzǵa jetti, BQO boıynsha qan aınalymy júıesi aýrýlarynyń erte anyqtalýy 9,6 paıyzdy kórsetti.
– Sozylmaly júrek jetkiliksizdiginiń 22 jáne dıslıpıdemııanyń 20 kabıneti jumys isteıdi. Oblys eresek kardıologtarmen 69,75 paıyzǵa jasaqtalǵan. Óńirde 49 kardıolog bolsa, sonyń 23-i statsıonarda, 26-sy emhanada eńbek etedi. № 2 Báıterek aýdany, Jánibek, Jańaqala jáne Bókeı ordasy aýdandyq aýrýhanalarynda 4 kardıolog jetispeıdi. Barlyq medıtsınalyq uıymdar kardıostandartpen qamtamasyz etilgen, biraq tozýyna baılanysty olardy aýystyrý qajet. Ehokardıografııa, arterıaldy qysymnyń táýliktik monıtorıngi, kúndelikti EKG monıtorıngi jáne júkteme synamalaryn «Qarashyǵanaq Petroleým Opereıtıng B.V.» kompanııasy jáne jergilikti bıýdjet esebinen satyp alý josparlanýda, - dep qosty E.Súıeýǵazıeva.
Eske sala keteıik, budan buryn Batys Qazaqstanda qyzylsha juqtyrǵandar sany 170-ke jýyqtaǵanyn jazǵan bolatynbyz.
