BQO-da qarasora ósirýshilerden 50 mln. astam teńgeniń esirtkisi tárkilendi
ORAL. QazAqparat - BQO ІІD esirtki bıznesimen kúres basqarmasynyń qyzmetkerleri Zelenov aýdany Sholpan aýylynan birneshe shaqyrym jerde, Jaıyq ózenine taıaý ormandaǵy úlken alqapta zańsyz qarasora ósirýmen aınalysqan úsh adamdy qolǵa túsirdi.
Departamenttiń baspasóz qyzmetinen túsken málimetke qaraǵanda, olar Qyzylorda qalasynyń 1951 jáne 1962 jylǵy qos turǵyny, taǵy bireýi 1964 jylǵy P. degen oraldyq bolyp shyqty.
Barlyǵy 1965 buta qarasora jáne 132 keliden astam marıhýana tárkilendi. Kúdiktilerden sondaı-aq qarasora óńdeıtin quraldar tabyldy. Sarapshylardyń baǵalaýynsha, qarasora butalarynan basqa tárkilengen esirtkiniń quny 50 mln. teńgeden asady.
Qazirgi kezde atalǵan úsh turǵyn Oral qalasyndaǵy ýaqytsha ustaý ızolıatoryna qamalyp, QR QK 300-baby 2-bóligi boıynsha tergeý amaldary júrgizilýde.
