BQO-da qarasora ósirýmen aınalysqan ákeli-balaly sottalýshylarǵa úkim shyqty
ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda qarasora ósirýmen aınalysqan ákeli-balaly sottalýshylarǵa úkim shyqty, dep habarlaıdy QazAqparat tilshisi.
Sýdıa Baqyt Ermahanovtyń málim etkenindeı, 1986 jylǵy Nıkolaı men 1961 jylǵy Vladımır Polıanskııler aıypty dep tanyldy.
N.Polıanskıı QR QK 297-baby 3-bóligi (esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) jáne 300-baby 2-bóligine (quramynda esirtki zattar bar, ósirýge tyıym salynǵan ósimdikterdi zańsyz egip-ósirý) sáıkes 11 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.
Al onyń ákesi V.Polıanskıı QR QK 28-baby 5-bóligi (keńesterimen, nusqaýlarymen, aqparat, osy is-áreketti jasaıtyn qarý nemese quraldar berýimen ne ony jasaýǵa kedergilerdi joıýymen qylmystyq quqyq buzýshylyqtyń jasalýyna járdemdesken adam), 297-baby 3-bóligi jáne 300-baby 2-bóligine sáıkes 10 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge kesildi.
Sot talqysynda málim bolǵanyndaı, ózara sóz baılasqan ákeli-balaly sottalýshylar ótken jyldyń mamyr-maýsymynda Báıterek aýdany Spartak aýyly mańynan úsh shaqyrym jerde Bykovka ózeniniń jaǵasynan kóp eshkimniń kózi túspeıtin jer telimin tapqan. Sol jerge balasy 121 shuńqyr qazyp, qarasora egýmen, ony óńdeýmen aınalyssa, ákesi qural-jabdyqtarmen qamtyp, ulyn kóligimen tasymaldaǵan. Tyńaıtqysh zattar da jetkizilgen.
Qazan aıynda ónim jınap, odan asa iri mólsherde, jalpy salmaǵy 32,135 kg keptirilmegen jáne 8 keliden astam keptirilgen marıhýana alǵan. Keıin avtokólikterimen esirtkini óz úılerine (Oral qalasy Poımennaıa kóshesi 10-úı jáne Báıterek aýdany Mıchýrın aýyly Naberejnaıa kóshesi 15-úı 2-páter) jetkizgen.
Budan basqa N.Polıanskıı óz úıinde satý maqsatynda ári esirtkiniń sapasyn arttyrý úshin 3,06 gramm gashısh jasap, sirińke qorabyna salyp, zańsyz saqtaǵan. Odan ákesi de qalyspaı, 27 keliden astam keptirilmegen jáne 7,6 keliden astam keptirilgen marıhýanany úıinde zańsyz saqtaǵan.
Sot úkimi zańdy kúshine engen joq.
