BQO-da Qarashyǵanaq ken orny men kommýnaldyq ınfraqurylym jobalary tanystyryldy
ASTANA.KAZINFORM — QR Premer-mınıstriniń birinshi orynbasary Nurlybek Nálibaev Batys Qazaqstan oblysyna jumys sapary aıasynda ınfraqurylymdyq damýda mańyzy zor strategııalyq jáne óndiristik birqatar nysandy aralap, jobalardyń júzege asyrylý barysymen tanysty. Bul týraly Úkimettiń baspasóz qyzmeti málim etti.
Eń aldymen, Premer-mınıstriniń birinshi orynbasary elimizdegi eń iri strategııalyq ken oryndarynyń biri — Qarashyǵanaq munaı-gaz kondensat ken ornyna bardy. Joba operatory «Qarashyǵanaq Petrolıým Opereıtıng B.V.» (QPO) kompanııasy halyqaralyq konsortsıým aıasynda jumys istep jatyr.
Onda kompanııa basshylyǵymen kezdesý ótip, onda qazirgi óndiristik kórsetkishter men jobany damytýdyń keleshegi talqylandy. Delegatsııa ken ornynyń negizgi óndiristik nysandary jumysymen, sondaı-aq ınvestıtsııalyq jobalardyń júzege asyrylý barysymen, onyń ishinde qýattylyqty odan ári keńeıtýge baǵyttalǵan QRK-1B jobasymen tanysty.
QPO bas dırektory Marko Marsılı kompanııa qyzmetine sholý jasap, sońǵy jyldary júzege asyrylǵan jobalar konsortsıýmnyń joǵary kúrdeliliktegi mindetterdi tıimdi oryndaý qabiletin kórsetkenin atap ótti. Sondaı-aq kompanııanyń óńirdi turaqty damytýǵa qosqan úlesine erekshe nazar aýdaryldy.
— QPO óz qyzmetin áleýmettik jaýapkershilik, ashyqtyq jáne qorshaǵan ortaǵa uqypty qaraý qaǵıdattary negizinde júzege asyrady. Qyzmeti bastalǵannan beri QPO tabıǵatty qorǵaý jobalaryna $467 mln baǵyttady. Biz metan shyǵaryndylaryn azaıtýǵa jáne bıoártúrlilikti saqtaýǵa erekshe kóńil bóle otyryp, «Taza Qazaqstan» bastamasyn belsendi qoldaımyz. Atap aıtqanda, 800 gektar alqapta kógaldandyrý jumystary júrgizildi. QPO oblystyń áleýmettik ınfraqurylymyn damytýǵa belsendi ınvestıtsııa quıýdy jalǵastyrýda. 1998 jyldan bastap 2025 jyldyń sońyna deıin kompanııa qarajatyna jalpy somasy $901,98 mln-dy quraıtyn 268 áleýmettik jáne ınfraqurylymdyq nysan paıdalanýǵa berildi. Biz Qazaqstan Respýblıkasynyń ekonomıkalyq ósýine yqpal ete otyryp, jergilikti halyqtyń turaqty damýy men órkendeýine jaǵdaı jasap, elge barynsha paıda ákelýge umtylamyz, — dep atap ótti Marko Marsılı.
Ol sondaı-aq kompanııa óndirýdiń turaqty ósimin kórsetýdi jalǵastyryp, ken ornynyń óndiristik qýatyn keńeıtýge ınvestıtsııa salyp jatqanyn tilge tıek etti.
Óz kezeginde Nurlybek Nálibaev munaı-gaz salasynyń el ekonomıkasy úshin strategııalyq mańyzyna toqtalyp, onyń ónerkásiptik ósýdiń negizgi draıverleriniń biri retindegi rólin erekshe atap ótti. Ol kompanııa jumysyn joǵary baǵalap, QPO ujymyna Qarashyǵanaq ken ornyn ıgerýde tabys tiledi.
Budan bólek, Premer-mınıstriniń birinshi orynbasary óńirge jumys sapary aıasynda «Jaıyqjylýqýat» kásipornynda boldy. «Energetıkalyq jáne kommýnaldyq sektordy jańǵyrtý» ulttyq jobasy aıasynda atqarylǵan jumystar men keshendi is-sharalar jospary tanystyryldy.
— Strategııalyq nysan Oral qalasyn jylýmen jáne ystyq sýmen qamtamasyz etedi. 2023 jyly munda gradırnıa tolyq aýystyrylyp, ekologııalyq turǵydan tıimdi sheshim qabyldandy. Nátıjesinde, Jaıyq ózeninen alynatyn tehnıkalyq sý kólemi jylyna 4 mln tekshe metrge únemdeldi. 1960 jyldan beri jumys istep turǵan № 1 týrboagregat ta tolyq jańartylyp, stansanyń jalpy qýaty qosymsha 12,5 MVt-qa artty, — delingen Úkimettiń habarlamasynda.
Byltyr «Hitachi» japon kompanııasynyń qýaty 28,5 MVt bolatyn gaz týrbınalyq qondyrǵysy kúrdeli jóndeýden soń iske qosyldy. Mańyzdy másele aımaq basshysynyń tikeleı aralasýymen oń sheshildi. Japonııa elinde ótken kelissózder nátıjesinde qondyrǵynyń qosalqy bólshekterin óndirýshi zaýyt ózderi daıyndap, jetkizdi.
Premer-mınıstrdiń birinshi orynbasary ulttyq jospar aıasynda kommýnaldyq ınfraqurylymdy jańartý jumystaryn júıeli ári sapaly atqarýdy tapsyrdy.
Aıta keteıik, Oral jylý elektr ortalyǵy qazir «qyzyl» aımaqqa engizilgen. 2029 jylǵa deıin júrgiziletin jańǵyrtý jumystarynyń nátıjesinde kásiporynnyń tozý deńgeıin 83%-dan 60%-ǵa tómendetip, «sary» aımaqqa shyǵarý josparlanǵan.
Buǵan deıin QR Premer-mınıstriniń birinshi orynbasary Nurlybek Nálibaev Túrkistan oblysyna jumys sapary barysynda «Saıram-Ógem» memlekettik ulttyq tabıǵı parkinde ekologııalyq týrızmdi damytý máselelerine arnalǵan kóshpeli keńes ótkizgen bolatyn.
Іs-sharaǵa 50-den astam otandyq jáne sheteldik áleýetti ınvestor qatysyp, óńirde júzege asyrylady dep josparlanǵan ınvestıtsııalyq jobalar talqylandy.
