BQO-da qarasha aıynda 80-ge jýyq nysan sanıtarlyq talapty buzǵan

ORAL. QazAqparat – Batys Qazaqstan oblysynda monıtorıng toptary qarasha aıynda 78 nysannyń sanıtarlyq talapty buzǵanyn anyqtady, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaev óńirlik kommýnıkatsııalar qyzmeti alańynda ótken brıfıngide málim etkendeı, osy merzimde QR Ákimshilik quqyq buzý kodeksi 425-baby 1-bóligine sáıkes 123 hattama toltyryldy.

Sonyń ishinde kóp adamnyń qatysýymen ótken 49 is-shara tirkeldi. Sondaı-aq betperdelik rejımdi saqtamaýdyń 37, túngi saǵat 23.00-den keıin jeke kólikpen júrýdiń 25, jumys rejımin buzýdyń 11 jáne qyzmetkerlerge termometrııa júrgizbeýdiń 1 deregi belgili boldy. Osy ákimshilik quqyqbuzýshylyqtar úshin 7 mln astam teńge aıyppul salyndy.

Bul baǵyttaǵy jumystar jalǵasýda.

Nurlybek Ermekulynyń sózine qaraǵanda, 1-19 qarasha aralyǵynda oblysta 619 adamnyń koronavırýs juqtyrǵany tirkeldi. Osynyń 430-y nemese 69,4 paıyzy Oral qalasynda anyqtaldy. Sondaı-aq Báıterek (85 adam), Bórli (36), Terekti (18), Shyńǵyrlaý (15) aýdandarynda indet kóbeıip ketip otyr.

Qarashada memlekettik shekaradan 15463 adam ótse, sonyń 2790-y – jolaýshylar. Anyqtamasyz ótken 283 jolaýshynyń jeteýinen indet tabyldy. Sol sekildi júk tasymaldaıtyn 5402 júrgizýshiniń 2176-synda anyqtama bolmaǵan. Sonyń 20-sy koronavırýs juqtyrǵan.

Eske sala keteıik, budan buryn Batys Qazaqstanda 70-ke jýyq balanyń koronavırýs juqtyrǵanyn jazǵan bolatynbyz.