BQO-da qarasha aıynda 23 bala koronavırýs juqtyrǵan

ORAL. QazAqparat - Batys Qazaqstan oblysynda qarasha aıy bastalǵannan beri 23 bala koronavırýs juqtyrǵan, dep habarlaıdy QazAqparat tilshisi.

Oblystyq densaýlyq saqtaý basqarmasynyń baspasóz qyzmeti málim etkenindeı, bul indettiń balalar arasynda da kúrt kóbeıip otyrǵanyn kórsetedi.

Budan buryn qyrkúıek aıynda 4, qazanda 5 balanyń aýyrǵany tirkelgen bolatyn.

Oblysta sońǵy aptada 237 adam dert juqtyrǵan. Sońǵy táýlikte 45 adamnyń syrqattanǵany belgili boldy.

Oblysta indet bastalǵannan beri 7274 adam aýyrsa, sonyń 6898-i jazylyp shyqty. 121 adam qaıtys boldy.

Qazirgi tańda pnevmonııaǵa shaldyqqan 150 adam emdelýde.

Juqpaly aýrýlar aýrýhanasynda 115, karantındik statsıonarda 35, jansaqtaý bóliminde 10 adam jatyr.

Oblysta rezervte 2044 oryn ázir.

Eske sala keteıik, budan buryn BQO-da sanıtarlyq posttar qoıylatynyn jazǵan bolatynbyz.