BQO-da karantın talabyn buzǵandarǵa 21 mln teńge aıyppul salyndy
ORAL. QazAqparat – Batys Qazaqstan oblysynda qarasha aıy bastalǵannan beri monıtorıngtik toptar 41 nysanda shekteý sharalary buzylǵanyn anyqtady, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, 12 kún ishinde QR Ákimshilik quqyqbuzýshylyq kodeksiniń 425-baby 1-bóligine sáıkes 63 ákimshilik hattama toltyryldy.
Sonyń ishinde 35-i otbasylyq toı-dýman, sadaqa jasaǵandarǵa, 24-i jeke qorǵanysh quraldaryn qoldanbaǵan turǵyndarǵa qatysty boldy.
Osy buzýshylyqtar boıynsha 21 mln astam teńge aıyppul salyndy.
N.Mustaevtyń sózine qaraǵanda, oblysta koronavırýsqa baılanysty epıdemıologııalyq ahýal kúrdelenip barady. Apta saıyn indettiń orta eseppen 59 paıyzǵa ósýi baıqalady.
1-12 qarasha aralyǵynda barlyǵy 358 adam koronavırýs juqtyrsa, sonyń 252-si nemese 70,3 paıyzy Oral qalasynyń úlesine tıedi. Sondaı-aq Báıterek aýdanynda – 41, Bórlide – 25, Terekti men Shyńǵyrlaýda – 10-nan, Jańaqalada – 5, Jánibekte – 4, Qaratóbe, Syrym, Qaztalovta – 3-ten, Bókeı ordasy men Aqjaıyqta bir-birden adamnyń indetpen aýyrǵany tirkeldi.
Qarasha aıynda memlekettik shekaradan 8559 adam ótse, sonyń 1688-i – jolaýshylar. Anyqtamasyz ótken 159 jolaýshynyń tórteýinen koronavırýs tabyldy. Sol sekildi halyqaralyq júk tasymaldaıtyn 2962 júrgizýshi ótse, sonyń 1577-sinde anyqtama joq bolyp shyqty. Sonyń ishinde 14 júrgizýshiniń indet juqtyrǵany belgili boldy.
«Osy aıda oblys boıynsha 15747 adam (indet bastalǵannan beri – 179464) zerthanalyq tekserýden ótti. Kúni búgin óńir PTR dıagnostıkasy úshin 32646 zertteýge arnalǵan 652 test júıesimen qamtamasyz etilgen», dedi Nurlybek Mustaev.
Eske sala keteıik, budan buryn BQO-da shekaradan 25 myńǵa jýyq adamnyń ótkenin jazǵan bolatynbyz.
