BQO-da karantın rejımin buzǵan turǵyn ustaldy
ORAL. QazAqparat – Batys Qazaqstan oblysynda karantın rejımin buzyp, basqa aýdanǵa ketip qalǵan turǵyn qamaýǵa alyndy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, Terekti aýdany Aqjaıyq aýylynyń turǵyny QR Ákimshilik quqyqbuzýshylyq kodeksi 476-baby 2-tarmaǵyna (tótenshe jaǵdaı talabyn buzý) sáıkes aıypty dep tanyldy.
Terekti aýdandyq №2 sotynyń qaýlysymen ol 15 táýlikke ákimshilik qamýǵa alyndy.
Qaýly zańdy kúshine engen joq.
Sot talqysynda anyqtalǵanyndaı, atalǵan turǵyn úıine 26 naýryz kúni Aqmola oblysynan kelgen.
Kelesi kúni aýdandyq aýrýhana qyzmetkerleri koronavırýs indetiniń taralý qaýpine baılanysty úıinen shyqpaý, karantın talaptaryn saqtaý kerektigin túsindirgen. Alaıda muny qulaǵyna ilmegen turǵyn 29 naýryz kúni basqa aýdanǵa ketip qalǵan.
Eske sala keteıik, budan buryn BQO-da tótenshe jaǵdaı talabyn buzǵan aqtóbelik júrgizýshiniń qamaýǵa alynǵanyn, Oralda 9 qabatty úıdiń tóbesinde arba súıregen adamnyń serýendegenin jáne óńirde shekteý sharalary engizilgennen beri 88 adamnyń jaýapqa tartylǵanyn jazǵan bolatynbyz.
