BQO-da karantın rejimin buzǵan turǵyn qamaýǵa alyndy
ORAL. QazAqparat - Batys Qazaqstan oblysynda karantın rejimin buzǵan turǵyn qamaýǵa alyndy, dep habarlaıdy QazAqparat tilshisi.
Terekti aýdandyq sotynan túsken málimetke qaraǵanda, Podstepnyı aýylynyń Ý. degen turǵyny QR Ákimshilik quqyqbuzýshylyq kodeksi 476-baby 2-tarmaǵyna (tótenshe jaǵdaı rejimin buzý) sáıkes aıypty dep tanylyp, 10 táýlikke qamaldy.
Atalǵan turǵyn 29 naýryz kúni karantın rejimin buzyp, úıinde bolmaǵan.
Sot talqysynda atalǵan er adamnyń túsindirgenindeı, ol 26 naýryz kúni Máskeýden kelgen. Memlekettik shekaradan ótkennen keıin koronavırýstyń bar-joǵyn anyqtaıtyn zerthanalyq taldaý tapsyrǵan. Sodan keıin onyń qorytyndysyn kútip, medıtsınalyq mekemede oqshaýlanýda bolý kerek edi. Alaıda ony kútpeı, ózdiginen ketip qalǵandyqtan, ákimshilik aıyppul salynǵan. Sottan keıin 14 kún boıy karantınde bolý kerektigin bilmegendikten, dárigerge qaıtyp barmaǵan.
Sot aktisi zańdy kúshine engen joq.
Eske sala keteıik, budan buryn Oralda jazasyn óteýshilerdiń 36 myńǵa jýyq medıtsınalyq maska tikkenin jazǵan bolatynbyz.
