BQO-da qaramaǵyndaǵy qyzmetkeri para alǵany úshin basshy qyzmetinen ketti

ORAL. QazAqparat – BQO polıtsııa departamenti jergilikti polıtsııa qyzmeti basqarmasy bastyǵynyń orynbasary Manarbek Najıev qyzmetinen bosatyldy, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen túsken málimetke qaraǵanda, M.Najıevpen birge atalmysh basqarma bastyǵy Kenjebek Qýspaev ta qyzmetinen bosatý týraly raport jazǵan.

Budan buryn habarlanǵanyndaı, BQO-da para aldy degen kúdikpen birneshe polıtsııa qyzmetkeri ustalǵan bolatyn. Sonyń ishinde vzvod komandıri qolǵa túsip, abaqtyǵa qamalǵan edi.

«Oblysta oryn alǵan vzvod komandıriniń para alý ústinde ustalý dereginen keıin M.Najıev departamenttegi tártiptik komıssııanyń sheshimimen qyzmetinen bosatyldy. K.Qýspaevqa qatysty qujattar QR Іshki ister mınıstrliginiń kelisimin alý úshin jiberildi», dedi QazAqparat tilshisine departamenttiń baspasóz hatshysy Bolatbek Belgibekov.

Buǵan deıin, Batys Qazaqstan oblystyq polıtsııa departamenti patrýldik polıtsııasynyń birqatar qyzmetkeri, onyń ishinde vzvody komandıri men polıtsııa kapıtany ustalǵany týraly habarlaǵan bolatynbyz.