BQO-da qar qursaýynda qalǵan kólikter sany 184-ke jetti
ORAL. QazAqparat - Batys Qazaqstan oblysynda borannyń jıileýi qarym-qatynasty qıyndatyp otyr, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, 24 qańtar kúni saǵat 16.30-dan túngi 23.45-ke deıin Jánibek aýdany Aqoba aýyldyq okrýginde «Aqoba-Jánibek» jolynyń 15-25 shaqyrymynda 2 jeńil jáne 2 («ÝAZ») jolaýshylar kóligi qar qursaýynan shyǵaryldy. Bularda 23 adam bolǵan.
Sol sekildi 25 qańtarǵa qaraǵan túni saǵat 00.00-de Syrym aýdanynda «Jympıty-Aqsaı» jolynyń 10-shaqyrymynda 1 jeńil kólik (3 adam) joldyń tazartylǵan bóligine jetkizildi.
Jyl basynan beri barlyǵy 184 kólik qar qursaýynan shyǵarylyp, 201 adam qutqaryldy. 162 adam evakýatsııalandy.
Eske sala keteıik, keshe boranǵa baılanysty BQO-da joldardyń jabylǵanyn jazǵan bolatynbyz.
Búgin saǵat 09.00-den bastap respýblıkalyq «Qaztalov-Jánibek-RF shekarasy», «Ónege-Bısen-Saıqyn», «Oral-Tasqala-RF shekarasy» jáne oblystyq mańyzy bar «Tasqala-Aqqýraı-Bolashaq» jolynan basqa joldar ashyldy.
Alaıda BQO jolaýshylar kóligi jáne avtomobıl joldary basqarmasynyń málimeti boıynsha qatty boranǵa baılanysty saǵat 10.00-den bastap oblystyq mańyzy bar «Aqsaı-Shyńǵyrlaý», «Shyńǵyrlaý-Lýben-Segizsaı» joldary jabyldy.
