BQO-da qandaı kompanııalar joldy sapasyz salady

ORAL. QazAqparat – Batys Qazaqstan oblysynda tekserý kezinde joldardyń sapasyz salynǵany anyqtaldy, dep habarlaıdy QazAqparat tilshisi.

BQO boıynsha sybaılas jemqorlyqqa qarsy qyzmet basshysynyń birinshi orynbasary Nurdáýlet Samettiń málim etkenindeı, avtomobıl joldarynyń sapaly salynýyn qamtamasyz etý jáne osy salada sybaılas jemqorlyqqa jol bermeý maqsatynda ótken jyldyń 10 maýsymynan beri «Sapaly jol – adaldyq alańy» jobalyq keńsesi jumys jasap keledi.

«Joba aıasynda «Jol aktıvteri ulttyq sapa ortalyǵy» RMK BQO fılıalymen jáne arnaıy monıtorıng múshelerimen birlesip, bıyl oblystyq – bir jáne Oral qalasyndaǵy tórt avtomobıl jolyn teksergen kezde kemshilikter anyqtaldy», - deıdi N.Samet.

Mysaly, Oraldaǵy Lesozaşıtnaıa kóshesinde (bas merdigeri – «Anýsh qurylys» JShS) káriz qudyqtarynyń qaqpaq lıýkteri asfalttyń joǵarǵy qabatynan shamamen 8 santımetr tómen salynǵan. Oǵan qosa, jobada turǵynjaılarǵa kireberister eskerilmegen jáne joldyń ekinshi betinde trotýar qarastyrylmaǵan. Bul, turǵyndarǵa qolaısyzdyq týdyrýda.

Sol sekildi 8 naýryz kóshesinde (bas merdigeri «Túrkistan Jol Servıs» JShS) jol júrý bóligi trotýardan 7 santımetrge joǵary salynǵan. Turǵynjaılarǵa kireberis joq, jol jıekteriniń bekitilmeýi onyń buzylýyna ákep soqtyrady.

Nurdáýlet Samettiń sózine qaraǵanda, Á.Moldaǵulova kóshesinde (bas merdigeri – «Birlik» JShS) ótken jylǵy eskertýlerdi joıý jumystaryna monıtorıng júrgizilgen. Alaıda, merdiger aqaýlardy áli kúnge deıin retke keltirmegen. Atap aıtqanda, merdiger kepildik mindettemelerge sáıkes jol tóseminiń joǵarǵy qabatyn aýystyrýy tıis edi. Onyń ornyna tek shuńqyrlardy jóndeý jumystary bastalǵan.

Báıterek aýdanyndaǵy Úlken Shaǵan – Peremetnyı jolyn ortasha jóndeý (bas merdigeri – «ASFA» JShS) kezinde avtokólikter úshin aınalyp ótetin jol qarastyrylmaǵan. Al jol jóndeý jumystary bir qozǵalys jolaǵyn jabý arqyly júrgizilýde. Mundaı kemshilikter júrgizýshilerge qıyndyq týǵyzýda.

Monıtorıng qorytyndysyna sáıkes olqylyqtardy joıý úshin tapsyrys berýshige tıisti hattar jiberildi.

Eske sala keteıik, budan buryn Oralda jańa kópirde salynyp jatqan jıektastyń talapqa saı kelmeıtinin jazǵan bolatynbyz.