BQO-da qalyń qar jaýyp, burqasyn bolatyny jóninde turǵyndarǵa eskertý jasaldy
ORAL. KAZINFORM — Batys Qazaqstan oblysynda 31 jeltoqsan kúni qar jaýyp, burqasyn soǵady.
«Qazgıdromet» RMK BQO fılıalynyń málimetine qaraǵanda, kúndiz oblystyń soltústigi men shyǵysynda qalyń qar jaýady.
Óńirdiń batysy men ońtústiginde tuman túsip, kóktaıǵaq bolýy yqtımal. Jeldiń ekpini sekýndyna 15-20 metrge deıin jetedi.
Osyǵan baılanysty TJ departamenti turǵyndarǵa alys jolǵa shyqpaý kerektigin eskertti. Sharýa qojalyqtary basshylary qaraýyndaǵy adamdardy dalaǵa jibermeýi, al maldy qorada ustaýy qajet. Tótenshe jaǵdaı týyndaǵan kezde 101 nemese 112 nómirlerine qońyraý shalǵan abzal.
«QazAvtoJol» UK» AQ BQO fılıalynyń málimeti boıynsha qalyń qar men kúshti jelge baılanysty respýblıkalyq mańyzy bar Aqtóbe-Oral-RF shekarasy jolynda (273-393 km, Barbastaý-Jympıty aralyǵy) 30 jeltoqsan kúngi saǵat 16.00-den bastap júk jáne qoǵamdyq kólikter úshin shekteý engizildi.
Sonymen qatar BQO polıtsııa departamenti aýa raıynyń nasharlaýyna baılanysty júrgizýshilerge jol qozǵalysy erejelerin qatań saqtaý kerektigin eske saldy.
— Basyp ozý manevrin tek jol qaýipsizdigine tolyq kóz jetkizgennen keıin ǵana bastańyzdar. Avtokóliktiń tehnıkalyq jaǵdaıyna erekshe nazar aýdarý qajet. Qaýipsiz araqashyqtyqty saqtap, belgilengen jyldamdyq rejıminen aspańyzdar jáne kenetten toqtaýǵa jol bermeńizder. Kólik júrgizýshileri árdaıym muqııat bolyp, ózderiniń qasyndaǵy jolaýshylardyń, sondaı-aq jol qozǵalysynyń basqa da qatysýshylarynyń ómiri men densaýlyǵyna jaýapty ekenderin umytpaýlary tıis, — delingen resmı málimette.
Eske sala keteıik, budan buryn BQO-da taǵy bir er adamnyń denesi tabylǵanyn jazǵan edik.