BQO-da qaldyqtaryn zańsyz ornalastyrǵan kompanııadan 2 mlrd-tan astam qarjy óndirildi

ORAL. QazAqparat - Tabıǵat qorǵaý prokýratýrasynyń yqpal etý aktisimen BQO boıynsha memlekettik kirister departamenti burǵylaý qaldyqtaryn zańsyz ornalastyrǵany úshin «Oral Oıl end Gaz» JShS-dan oblys bıýdjetine 2,07 mlrd teńge salyq tólemin óndirdi.

BQO prokýratýrasynyń baspasóz qyzmetinen túsken málimetke qaraǵanda, ónerkásip qaldyqtaryn joıatyn keshenniń joqtyǵyna baılanysty atalǵan seriktestik qaýipti burǵylaý qaldyqtaryn oblys aýmaǵynan tys jerge tasý úshin tasymaldaýshy uıymdarmen kelisim-shart jasaǵan. Bul atalǵan qaldyqtardyń ruqsat berilmegen jerler: eldi mekender men memlekettik qoryqtar mańyna, Oral qalasy men Zelenov aýdanynyń aýyl sharýashylyǵy jerlerine baqylaýsyz ornalastyrylýyna «múmkindik bergen».

QR Ekologııalyq kodeksiniń 283-babyna sáıkes jeke jáne zańdy tulǵalar ózderiniń qyzmeti nátıjesinde quralatyn óndiris jáne tutyný qaldyqtarynyń menshik ıesi jáne soǵan jaýapty bolyp tabylady.