BQO-da qaldyq oryndaryn baqylamaǵan aýdan ákiminiń orynbasary sógis aldy
ORAL. KAZINFORM – Batys Qazaqstan oblysy Qaratóbe aýdanynyń prokýratýrasy jergilikti atqarýshy organdardyń qyzmetinde qatty turmystyq qaldyqtardy basqarý kezindegi zańdylyqtyń saqtalýyna taldaý júrgizdi.
BQO prokýratýrasynyń baspasóz qyzmetinen málim etkenindeı, taldaý nátıjesinde bul baǵyttaǵy jumystyń uıymdastyrylmaǵany anyqtaldy.
Jyl saıyn Qaratóbe aýdanynda turǵyndardan 15 620 myń tekshe metrden astam tutyný jáne óndiris qaldyqtary jınalady.
Qaratóbe aýdandyq máslıhatynyń 2024 jylǵy 27 qyrkúıektegi sheshimimen bekitilgen 2024-2028 jyldarǵa arnalǵan kommýnaldyq qaldyqtardy basqarý jónindegi baǵdarlama eskirgen sanıtarlyq erejeler men normalardyń negizinde daıyndalǵan. Oǵan tipti Qaratóbe aýdanynyń aýmaǵynda joq eldi mekende qatty turmystyq qaldyqtar polıgonyn jaılastyrý jónindegi is-sharalar engizilgen.
Prokýratýranyń narazylyǵy boıynsha máslıhat sheshiminiń kúshi joıyldy.
Prokýratýra málimetine qaraǵanda, kommýnaldyq qaldyqtardy ornalastyratyn 16 nysannyń barlyǵy ekologııalyq talaptarǵa jáne sanıtarlyq erejeler men normalarǵa sáıkes kelmeıtini anyqtaldy. Qoqys úıindileri qorshalmaǵan, olarǵa úı janýarlarynyń et-terisiniń qaldyqtaryn shyǵarýǵa jáne kómýge jol berilgen. Qatty turmystyq qaldyqtardy jınaý jumysy qolǵa alynbaǵan.
Qatty turmystyq qaldyqtarǵa arnalǵan konteınerler tek 4 eldi mekende ǵana jabdyqtalǵan, bul rette olar qaqpaqtarmen jabylmaǵan. Saldarynan jel soqqanda, qoqys aýyl aýmaǵyna taralady.
Saraljyn, Sýlykól jáne Qoskól aýyldyq okrýgterinde qoqys konteınerlerine arnalǵan alańdar qatty jabynmen jáne úsh jaǵynan qorshaýmen jabdyqtalmaǵan. Aýdan ortalyǵynda qoqys konteınerleri turǵyn úılerden 25 metrden kem qashyqtyqta ornalasqan. Oǵan qosa turǵyndardyń qatysýymen komıssııalyq belgileý rásimi ótkizilmegen.
- Qaratóbe aýdany prokýratýrasynyń usynysy boıynsha ákimdikter sanıtarlyq erejeler men normalarǵa sáıkes qaldyqtardy jınaýǵa arnalǵan arnaıy alańdardy jaılastyrýdy qamtamasyz etti. Polıgon men qoqys tastaıtyn jerlerdi ekologııalyq talaptarǵa sáıkes keltirý maqsatynda 2026-2030 jyldarǵa arnalǵan ınvestıtsııalyq jospar bekitildi. Qaldyqtarmen jumys isteý máseleleri boıynsha vedomstvolyq baqylaýdy betimen jibergeni úshin Qaratóbe aýdany ákiminiń orynbasary Muhtar Shaıjanov sógis túrindegi tártiptik jaýapkershilikke tartyldy, - dep habarlady vedomstvodan.
Eske sala keteıik, budan buryn BQO-da 147 qatty turmystyq qaldyqtar polıgonynyń tek 22-siniń ruqsat qujattary bar ekendigin jazǵan bolatynbyz.