BQO-da qalalyq medıtsına uıymdarynda 116 maman jetispeıdi
ORAL. KAZINFORM — Batys Qazaqstan oblysynda barlyǵy 368 densaýlyq saqtaý mekemesi jumys isteıdi.
BQO densaýlyq saqtaý basqarmasynyń basshysy Madııar Óteshevtiń óńirlik kommýnıkatsııalar qyzmeti alańynda ótken brıfıngte málim etkenindeı, solardyń qatarynda statsıonarlar, emhanalar, aýdandyq aýrýhanalar, 66 dárigerlik ambýlatorııa, 62 feldsherlik-akýsherlik pýnkt, 199 medıtsınalyq pýnkt bar.
Madııar Amangeldiulynyń sózine qaraǵanda, Memleket basshysynyń tapsyrmasyna sáıkes «Aýyldyq densaýlyq saqtaýdy jańǵyrtý» ulttyq jobasy aıasynda oblys boıynsha aýyldyq eldi mekenderde 50 densaýlyq saqtaý nysanynyń qurylysy tolyq aıaqtaldy.
— Atalǵan ulttyq joba aıasyndaǵy jumystar bıyl da jalǵasady. Atap aıtqanda, Bórli jáne Qaztalov aýdandyq aýrýhanalaryn jańǵyrtyp, olardy aýdanaralyq aýrýhanalar deńgeıine kóterý josparlanǵan. Qosymsha korpýstardyń qurylysy aıaqtalǵannan keıin atalǵan aýrýhanalarda tar beıindi bólimsheler ashylyp, kompıýterlik tomografııa, magnıttik-rezonanstyq tomografııa, angıograf sııaqty zamanaýı medıtsınalyq jabdyqtarmen qamtylady. Bul óz kezeginde irgeles aýdandar halqy úshin joǵary mamandandyrylǵan medıtsınalyq kómektiń qoljetimdiligin arttyrady, — dedi M.Óteshev.
Onyń aıtýynsha, 2025 jyly oblystyń densaýlyq saqtaý salasyna arnalǵan bıýdjet kólemi 105,0 mlrd teńge boldy. Ulttyq statıstıka derekterine sáıkes óńirde ortasha ómir súrý uzaqtyǵy 74,14 jasqa jetti. Sońǵy 10 jylda jalpy ólim-jitim kórsetkishi 9,3-ten 7,71-ge deıin tómendedi. Sondaı-aq náresteler ólimi aıtarlyqtaı azaıdy: 2022 jyly — 8,28, 2023 jyly — 8,0, 2024 jyly — 7,9, 2025 jyly — 5,8.
— Qazirgi tańda oblystyń densaýlyq saqtaý júıesinde 1 800 dáriger jáne 6 500-den astam orta medıtsınalyq qyzmetker eńbek etedi. Oblys boıynsha 180 dáriger kadr tapshylyǵy bolsa, sonyń 116-sy qalalyq, 64-i aýdandyq medıtsına uıymdaryna qajet. Ásirese, jalpy tájirıbe dárigerleri, akýsher-gınekologtar, jalpy hırýrgtar men terapevter jetispeı otyr. Osy máseleni sheshý maqsatynda 2025 jyldan bastap kóterme járdemaqy mólsheri aýyldyq jerlerde 8,5 mln teńgege, qalada 5,0 mln teńgege deıin ulǵaıtyldy. 2024–2025 jyldary oblysqa tıisinshe 137 jáne 190 maman keldi. Osylaısha, sońǵy eki jylda barlyǵy 327 dáriger óńirge tartyldy. 2025 jyly kóterme járdemaqy tóleýge jáne kelgen mamandardy turǵyn úımen qamtamasyz etýge 1 mlrd teńgeden astam qarjy bólindi, — dedi basqarma basshysy.
Onyń naqtylaýynsha, jyl saıyn oblys ákimdigi tarapynan elimizdiń medıtsınalyq joǵary oqý oryndaryna 45 grant bólinedi, sondaı-aq rezıdentýraǵa shamamen 20 grant qarastyrylady. Bul is-sharalar óńirdi qajetti mamandarmen qamtamasyz etýge septesedi.
Eske sala keteıik, budan buryn Oralda jańa emhana salý qajettigi týyndaǵanyn jazǵan edik.