BQO-da Qadyr Myrza Áliniń 90 jyldyǵyna arnalǵan mereıtoılyq is-sharalar máresine jetti
ORAL. KAZINFORM – Batys Qazaqstan oblysynda aqyn, Memlekettik syılyqtyń ıegeri, Qazaqstannyń halyq jazýshysy Qadyr Myrza Áliniń 90 jyldyǵy keń kólemde toılandy.
Qadyrdy Aqjaıyq jurtshylyǵy aıryqsha qadir tutady. Oral qalasy men Syrym aýdany ortalyǵy Jympıty aýylynda aqynnyń eńseli eskertkishi ornatylsa, Qadyr Myrza Áli atyndaǵy oblystyq mádenıet jáne óner ortalyǵy 10 jyldan beri jumys istep keledi.
Mereıtoı aıasynda aqyn eskertkishine gúl shoqtary qoıylyp, «Atameken» óner ortalyǵynda Ǵ.Qurmanǵalıev atyndaǵy oblystyq fılarmonııa artısteri dáýir darabozyna arnalǵan kontsert qoıdy.
Kesh barysynda sóz alǵan Batys Qazaqstan oblysynyń ákimi Narıman Tóreǵalıev Qadyr Myrza Áliniń óleńimen de, azamattyq bolmysymen de Táýelsizdigimizdiń irgetasyn qalasyp, ultymyzdyń rýhyn kótergen qaıratker ekenin atap ótti.
Búginde aqyn esimi Batys Qazaqstan oblysyndaǵy 3 mektep, 6 kóshe, 1 shaǵynaýdan, sonymen qatar oblystyq mádenıet jáne óner ortalyǵyna berilip, el qurmetiniń máńgilik belgisine aınaldy.
– Taǵy bir qýanyshty jańalyq – «Qadyr» ǵylymı-qoǵamdyq jýrnaly oqyrmanǵa jol tartty. Bul basylym Aq Jaıyq topyraǵynan túlegen aqyn-jazýshylardyń shyǵarmashylyǵyn keńinen tanytatyn rýhanııattyń jańa jarshysy bolatyny anyq. Sondaı-aq Qadyr aǵamyz ben Aq Jaıyqtyń juldyzy, Qazaqstannyń halyq ártisi Eskendir Hasanǵalıevtiń birlesken týyndysy – halqymyzdyń rýhyn asqaqtatqan «Atameken» ániniń shyqqanyna 55 jyl toldy. Bul án búginde barsha qazaqtyń júreginen oryn alǵan máńgilik rýhanı muraǵa aınaldy, - dedi óńir basshysy.
Aqynnyń jary Saltanat Myrzalıeva osyndaı qurmet úshin Aqjaıyq jurtshylyǵyna rızashylyǵyn bildirdi.
Qadyrdyń mol murasy – halqymyzdyń sarqylmas baılyǵy. Onyń 18 tomdyq shyǵarmalar jınaǵy – sonyń dáleli.
Mereıtoılyq is-sharada belgili metsenat, «Qadyr Myrza Áli» qoǵamdyq qorynyń quryltaıshysy, «KATEK» seriktestiginiń bas dırektory Qundyz Nupovtyń demeýshiligimen jaryq kórgen «Júregime jetken jyr» jáne «Qadyrdyń qanatty sózderi» atty qos jańa kitaptyń tusaýy kesildi.
Qazaqstan Jazýshylar odaǵynyń basqarma tóraǵasy, Qazaqstannyń eńbek sińirgen qaıratkeri Mereke Qulkenov Qadyr Myrza Áliniń qazaq rýhanııatyndaǵy ornyna toqtaldy.
– Osydan on jyl buryn Oralda Qadyrdyń ortalyǵy men eskertkishi ashylǵan kezde qazaqtyń taǵy bir ulysy, kemeńgeri Ábish Kekilbaı: «Qazaqtyń rýhanııatyna, qazaq poezııasyna Qadyrdaı eńbek sińirgen aqyn kemde-kem» degen edi. Men soǵan tolyq qosylamyn. Óıtkeni Qadyr balalarǵa arnalǵan taqpaqtardan bastap, qazaqtyń aqsaqaldary aıtqysy keletin sózdiń bárin jazyp ketken adam. Dombyranyń qadyr-qasıetin de jetkizgen aqyn. Keń dalamyzdyń da poezııalyq portretin jasap ketken sol Qadyr, - dedi M.Qulkenov.
«Qadyr murasy – ulttyń baǵa jetpes rýhanı qundylyǵy» atty respýblıkalyq ǵylymı-praktıkalyq konferentsııada da óreli oılar aıtyldy.
Budan keıin Qadyr toıy týǵan jeri – Syrym aýdanynda jalǵasty. Muqades Eslamǵalıuly atyndaǵy ortalyqtandyrylǵan kitaphana júıesinde Qadyr Myrza Áli atyndaǵy ádebıet jáne rýhanııat zaly óz esigin aıqara ashty.
Aqyn, Memlekettik syılyqtyń ıegeri Aqushtap Baqtygereeva óz sózinde kitaphanaǵa esimi berilgen Muqades Eslamǵalıulynyń óz ólkesiniń tarıhyn túgendep ketken jazýshy ekenin eske saldy.
– Qadyr – qazaqtyń Abaıdaı keıingi uly aqyny. Qazaqtyń urpaǵy aman turǵanda, aqynnyń 180 jyldyǵy da toılanatyny anyq. Biz osyndaı aqyn-jazýshylarymyzdyń týyndylaryn oqyp, nasıhattaı bilýimiz kerek, - dedi A.Baqtygereeva.
Sondaı-aq Qadyr aqyn atyndaǵy mektep qabyrǵasynda aqyn beınesine arnalǵan mýral ashyldy.
Dala qyzyqtarynan keıin Hadısha Bókeeva atyndaǵy qazaq drama teatry qoıǵan «Qadyr – Adam» spektakliniń premerasymen Qadyr toıy qorytyndylandy.
Eske sala keteıik, budan buryn Oralda aqyn Ǵumar Qarashtyń 150 jyldyǵyna arnalǵan músháıranyń máresine jetkenin jazǵan edik.