BQO-da Italııa, Ispanııa, Germanııadan kelgen 16 adam karantınde jatyr
ORAL. QazAqparat – Batys Qazaqstan oblysynda koronavırýsqa baılanysty 100-den astam adam baqylanýda, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentinen alynǵan málimetke qaraǵanda, qazirgi kezde 104 adam baqylaýda.
Sonyń ishinde 16 adam 1 «a» sanatyna (Frantsııa, Iran, Italııa, Ispanııa, Germanııa elderinen ushyp kelgender) jatady. Bulardyń bári de 14 kúndik karantınde.
Sol sekildi 1 «b» sanatyna kiretin 24 adam úıde oqshaýlaýda. Úı karantıninde bolatyn bular halyq kóp jınalatyn jerlerge barmaıdy. Al 2-sanattaǵy 63 adam úılerinde, olardyń jaǵdaıyn medıtsına qyzmetkerleri telefon shalyp, bilip turady.
Eske sala keteıik, budan buryn Oralda volonterler kóp balaly analarǵa maska men antıseptıkter taratqanyn jazǵan bolatynbyz.
