BQO-da ıt qabý jaǵdaılary kóbeıip ketti
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaev málim etkenindeı, bıylǵy úsh aıda qutyrma indeti boıynsha jaǵdaı turaqty bolǵanymen, ıt qaýyp, zardap shekkender sany ótken jylǵy osy kezeńmen salystyrǵanda, 3 paıyzǵa artqan.
Onyń aıtýynsha, jyl basynan bergi úsh aıda janýarlardyń tisteýi saldarynan 384 adam antırabııalyq kómekti qajet etken. Sonyń ishinde 73,4 paıyzy ıtten, 21 paıyzy mysyqtan, 3,1 paıyzy ózge úı janýarlarynan zardap shekken.
Departament basshysynyń sózine qaraǵanda, ıtterdiń joıylmaýy, degelmıntızatsııalaý sharalarynyń tolyq atqarylmaýy saldarynan turǵyndar arasynda parazıttik aýrýlar da órship otyr. Sonyń ishinde ehınokokkoz aýrýy kóbeıýde. Ehınokokkozdyń negizgi kózi – ıtterge tekserýdiń durys júrgizilmeýi. Buralqy ıtter parazıt kózi (tasymaldaýshysy) bolýy jáne olarmen tikeleı qatynas kezinde adam aýrý juqtyrýy múmkin. 2021 jyly 8058 ıt, 339 mysyq aýlansa, bıylǵy birinshi toqsanda 1150 ıt qana «torǵa túsken».
«Oblys boıynsha epıdemıologııalyq jaǵdaı salystyrmaly túrde turaqty bolǵanymen, rotavırýsty enterıt 9,3 ese (3-ten 28-ge), jelsheshek 4,9 ese (183-ten 906-ǵa), qyzamyq 3,9 ese (41-ten 160-qa), salmonellez 2 ese (6-dan 12-ge), dermatomıkoz 2 ese (8-den 16-ǵa), askarıdoz 2 ese (4-ten 8-ge) jedel respıratorly vırýsty ınfektsııa 1,7 ese (11 740-tan 20 940-qa), sozylmaly V vırýsty gepatıti 1,6 ese (8-den 13-ke), koronavırýs 1,6 ese (5925-ten 9584-ke), jiti ishek ınfektsııasy 1,5 ese (17-den 26-ǵa), sozylmaly S vırýsty gepatıti 1,3 ese (16-da 22-ge) kóbeıip otyr.
Qazirgi tańda karantındik shekteý sharalarynyń alynyp tastalýyna baılanysty barlyq nysandar qalypty jumys jasaýda. Osyǵan oraı salmonellez, jedel ishek juqpalary, dızenterııa, basqa ınfektsııalar ósýi múmkin degen boljam bar», - dedi M.Aryspaev.