BQO-da iri eki ken ornyn ashqan geologtar marapattaldy
QR IDM Geologııa jáne jer qoınaýyn paıdalaný komıteti Batys Qazaqstan aımaqtyq ınspektsııasynyń basshysy Mırbolat Tinálıevtiń atap ótkenindeı, sala qyzmetkerleri el ekonomıkasyn damytýǵa óz úlesterin qosyp keledi.
Óńirde eldi mekender turǵyndaryn taza aýyz sýmen qamtý baǵytynda jer asty sý kózderin izdestirý-barlaý, sondaı-aq seısmobarlaý, uńǵymalardy burǵylaý jumystary josparly júrgizilýde. Tek ótken jyly sheteldik jáne qazaqstandyq jeke qarajat kózderi esebinen izdestirý-baǵalaý jumystaryna 356 mıllıardtaı teńge quıyldy.
Ashylǵanyna 15 jyl bolǵan Chınarev munaıgaz kondensaty kenishinde jyl saıyn 1 mlrd tekshe metr gaz, 300 myń tonna munaı jáne 500 myńdaı tonna kondensat óndirilýde. «Oral Oıl end Gaz» JShS ashqan Rojkov geologııalyq qurylymyndaǵy ken ornynda búginde úsh kenniń ónimdiligi belgili boldy. Sol sekildi Sátımola dúnıejúzindegi iri kalıı ken orny bolyp tabylady, ondaǵy qor 3,1 mlrd tonnany quraıdy.
Jıynda Geologııa jáne jer qoınaýyn paıdalaný komıtetiniń buıryǵymen Chınarev kenishin ashýǵa atsalysqan Vıacheslav Drýjının, Abylaı Áljanov, Nıkolaı Matloshınskıı, Rafhat Baqtııarov, sonymen qatar Sátımola kalıı-borly tuz ken ornyn ashýǵa qatysqan Talǵat Qasenov, Mýftah Dıarov, Qasan Kamashev «Qazaqstan Respýblıkasynyń ken oryndaryn alǵash ashýshy» tósbelgilerimen marapattaldy. «Sátbor» JShS-nyń bas dırektory Talǵat Qasenov, «Karpovskıı Severnyı» kompanııasynyń bas dırektory Qaınolla Qasenov «Jer qoınaýynyń qurmetti barlaýshysy» atandy. Basqa da sala úzdikterine komıtettiń qurmet gramotalary tabys etildi.
