BQO-da ınvestorlar 30 myń bas mal bordaqylaıtyn alań salady
Qujatqa «Qytaı-ASEAN» 14-inshi EKSPO-syna qatysý úshin barǵan qazaqstandyq delegatsııanyń QHR Gýansı-Chjýan avtonomııalyq aýdany Nannın qalasyna sapary aıasynda qol qoıyldy. Kelisimge sáıkes taraptar Batys Qazaqstan oblysynda bir mezgilde 30 myń bas usaq maldy ustap, bordaqylaýǵa arnalǵan qazirgi zamanǵy alańdy qurmaqshy. Atalǵan mal «Batys Marka Lamb» JShS et kesheninde soıylyp, Qytaıǵa eksporttalatyn bolady. Investıtsııa kólemi 47 mln dollar bolady dep kútilýde, jobany 2018 jyldyń aıaǵyna deıin júzege asyrý kózdelýde.
«Qazirgi kezde Qazaqstanda mundaı mal bordaqylaý alańy joq. Jobanyń ekinshi kezeńinde eksportqa turaqty ónim jóneltýdi qamtamasyz etý úshin analyq mal ákelinedi. Negizinen romanov tuqymdas qoıdy ósirmekshimiz», dedi «QazAqparat» tilshisine «Batys Marka Lamb» JShS quryltaıshysy Raqymjan Ismaǵambetov.
«Green Plant» JShS basshysy Davıd Varagıan birlesken óndiris ornynyń eksporttyq múmkindikteri týraly áńgimelep berdi. «Kúni búgin bizdiń kompanııa Oraldan Iranǵa qoı etin tońazytylǵan kúıde jóneltýde. Qytaı tarapynan kez kelgen et ónimin qabyldaıtyn termınal tolyqtaı daıyn. Maýsym aıynyń aıaǵynda qytaılyq áriptestermen birge Shyńjań-uıǵyr avtonomııalyq ólkesi aýmaǵynda 800 tonnaǵa deıin tońazytylǵan etti saqtaýǵa arnalǵan ýaqytsha saqtaıtyn qoımasy bar kedendik logıstıkalyq ortalyq ashtyq», - dedi ol.
Eske sala keteıik, Qazaqstan yntymaqtastyq boıynsha arnaıy shaqyrylǵan áriptes retinde 14-inshi Qytaı men ASEAN jármeńkesine qatysýǵa erekshe mańyz berýde. Bul shara «HHІ ǵasyrdyń teńiz Jibek jolyn birge salý jáne óńirlik ekonomıka yqpaldastyǵyna septesýdegi týrızmniń rólin aıqyndaý» taqyrybynda ótedi. EKSPO-da Qazaqstannyń ulttyq pavılony ornalasyp, túrli ónimdermen 20 stendi qoıylmaq.
