BQO-da ınvestordyń 462 mln teńgelik sýarý jabdyǵyn paıdalanýǵa kedergi bolǵan másele sheshildi
ASTANA. KAZINFORM – Batys Qazaqstan oblysynyń Aqjaıyq aýdanynda prokýratýra aralasqannan keıin ınvestordyń jańbyrlatyp sýarý jabdyǵyn paıdalanýyna múmkindik týdy. Buǵan deıin «Kóshim» arnasyna sýdyń jetkiliksiz mólsherde berilýi saldarynan 462 mln teńgege ornatylǵan jabdyqty iske qosý múmkin bolmaǵan.
Batys Qazaqstan oblystyq prokýratýrasy baspasóz qyzmetiniń habarlaýynsha, «Nyǵmet» sharýa qojalyǵy jer ýchaskesin ıgerý úshin jańbyrlatyp sýarý jabdyǵyn ornatqan. Alaıda sý tapshylyǵy ınvestıtsııalyq jobany júzege asyrýǵa kedergi keltirgen.
Máseleni sheshý úshin aýdan prokýratýrasy ınvestor jáne «Qazsýshar» RMK-nyń Batys Qazaqstan oblystyq fılıaly ókilderimen kezdesý ótkizdi. Kezdesý nátıjesinde sý arnadan qajetti kólemde ári úzdiksiz berilýi qamtamasyz etildi.
Osylaısha, kásipkerlik qyzmetke kedergi bolǵan másele sheshilip, sýarý jabdyǵynyń isten shyǵý qaýpiniń aldyn aldy. Prokýratýranyń aralasýymen ınvestordyń quqyqtary qorǵalyp, aýyl sharýashylyǵy óndirisin damytýǵa jaǵdaı jasaldy.
-Investorlardyń quqyqtaryn qorǵaý jáne qolaıly ınvestıtsııalyq ahýal qalyptastyrý – prokýratýra organdary qyzmetiniń basym baǵyttarynyń biri. Batys Qazaqstan oblysynyń prokýratýrasy kásipkerler men ınvestorlar óz quqyqtary men zańdy múddelerin qorǵaý máseleleri boıynsha prokýratýra organdaryna júgine alatynyn eske salady,-delingen habarlamada.
Osyǵan deıin Qyzylordada ınvestor quqyǵyn shektegen kent ákimi jaýapqa tartylǵany týraly jazdyq.
