BQO-da ınvestıtsııalyq jobalardy júzege asyrýǵa 1,6 mlrd. teńge jumsalmaq
ORAL. QazAqparat - Batys Qazaqstan oblysynda bıyl kásipkerlerdiń ınvestıtsııalyq jobalaryn júzege asyrý baǵytynda jalpy sıpattaǵy transfertter esebinen 1,6 mlrd. teńge bólindi.
Bul týraly búgin Ortalyq kommýnıkatsııalar qyzmeti óńirlik fılıalynda BQO ákiminiń orynbasary Igor Steksov málim etti, dep habarlaıdy «QazAqparat» HAA tilshisi.
Onyń aıtýynsha, sonyń ishinde nesıeler boıynsha paıyzdyq mólsherlemeni sýbsıdııalaýǵa 1,4 mlrd. teńge, jeke kepildendirýge 94 mln. teńge, granttyq qarjylandyrýǵa 47 mln. teńge qaralǵan.
Sonymen birge ótken jyly «Damý» qorymen birlese otyryp, óńirlik qarjylandyrý baǵdarlamasy iske qosylǵan bolatyn. Munda nesıeler ekinshi deńgeıli bankter arqyly 8,5 paıyzdyq mólsherlememen berilýde. Kúni búginge deıin 1 mlrd. teńge nesıe úlestirildi. Mysaly, Zelenov aýdanynda atqa minýdi úıretý, ıppoterapııa, ulttyq sport túrlerin damytý baǵytynda qolǵa alynǵan «Sayat» etnotýrıstik ortalyǵyn qurý jobasy qarjylaı qoldaý tapty. Sonymen qatar qala ishinde júretin avtobýstardy jańartý da mańyzdy. Bórli aýdany ortalyǵy Aqsaı qalasynda jolaýshylar tasymaldaý úshin «Naztýr» JShS nesıe esebinen 12 qazirgi zamanǵy avtobýstar almaqshy.
2017 jyly sondaı-aq «Aýyl sharýashylyǵyn qarjylaı qoldaý qory» AQ-nyń qatysýymen agroónerkásip kesheni jobalaryn nesıeleý de jalǵasady. Bul maqsatqa oblystyq bıýdjet esebinen jáne atalmysh qor arqyly 300 mln. teńgeden bólinbek. Oǵan qosa ekinshi deńgeıli bankter arqyly «Damý» kásipkerlikti damytý qory» AQ-dan 700 mln. teńge qosymsha qarjy qaralmaq.
Aıta keteıik, qazirgi kezde bıznes salasynda 47 myń nysan bolsa, sonyń 41-i belsendi bolyp esepteledi. Ekonomıkalyq belsendi halyqtyń úshten bir bóligi shaǵyn jáne orta bızneste ornalastyrylǵan. Bıylǵy jyl basynan beri olar 848 mlrd. teńgeniń ónimin óndirdi.
«Bıznestiń jol kartasy - 2020» baǵdarlamasy aıasynda 2010 jyldan beri 77,1 mlrd. teńgeni quraıtyn 634 joba memleket tarapynan qoldaý tapty. Kásipkerlerdiń 57 jobasyna 2,7 mlrd. teńgege jetispeıtin ınfraqurylym tartyldy. Munyń bári 27,4 myń jumys ornyn saqtaýmen birge jańadan 4,3 myń oryn ashýǵa múmkindik berdi.
