BQO-da ınternet-alaıaqtyq saldarynan keltirilgen zalal 429 mln teńgeden asty
ORAL. KAZINFORM — Batys Qazaqstan oblysynda bıylǵy tórt aıda 206 ınternet-alaıaqtyq deregi tirkeldi, bul ótken jylǵy osy kezeńdegiden (179) 15,1 paıyzǵa kóp.
BQO polıtsııa departamenti kıberqylmysqa qarsy is-qımyl basqarmasynyń bastyǵy, polıtsııa polkovnıgi Artýr Musaǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, keltirilgen jalpy zalal kólemi 429 mln 231 myń teńgeden asty.
Artýr Ǵaısaulynyń sózine qaraǵanda, alaıaqtyq saldarynan eń kóp zardap shekkender: jumyssyzdar — 90, zeınetkerler — 32, jeke kompanııada jumys isteıtinder — 52, bilim berý salasyndaǵylar — 16, medıtsına qyzmetkerleri — 12 jáne stýdentter — 4 adam.
— Taldaý jasaý kezinde anyqtalǵanyndaı, 206 qylmystyq istiń 62-si ótken jyldardaǵy oqıǵalar boıynsha tirkelgen. Qylmystyq isterdiń 88-i — ózin bank qyzmetkerimin dep tanystyrǵandar, 28-i — jalǵan ınvestıtsııa, 10-y — onlaın taýardy satyp alý, 61-i — qyzmet kórsetý, 11-i — onlaın nesıe, bireýi — qolma-qol aqshaǵa aınaldyrý, beseýi –«WhatsApp» jelisin buzý jáne ekeýi basqa derekter boıynsha qozǵalǵan. Zeınetkerlerdiń kóbi jalǵan ınvestıtsııaǵa aqsha salý túrimen aldanyp otyr, al olardyń keıbireýlerin alaıaqtar «salǵan aqshańyzdyń ósimi» dep dropper retinde paıdalanǵan, — deıdi A.Musaǵalıev.
Onyń aıtýynsha, alaıaqtar zeınetkerlerge burynǵy jumys ornynda tergeý júrip jatqanyn syltaýratyp, aldap, qarjysyn jymqyrǵan. Solardyń ishinde bireýi óziniń páterin arzan baǵaǵa satyp, aqshasyn alaıaqtarǵa berip jibergen.
Búgingi tańda tsıfrlandyrý men jasandy ıntellektiniń qarqyndy damýy kezeńinde turǵyndar óte saq bolýy kerek. Sebebi alaıaqtar osy jańa tehnologııalardy óz paıdasyna qoldanyp, aılalaryn iske asyrýda.
— Ótken jyldyń 4 aıynda 81 qylmystyq isti óndirispen aıaqtasaq, bul kórsetkish bıyl (116) 35-ke ósti. Qazirgi tańda ınternet-alaıaqtyq jasaǵan qylmyskerlermen qatar olarǵa járdemdesken adamdar (kýrerler, aktıvatorlar jáne basqalar) jaýapqa tartylýda. Sonymen qatar jyl basynan beri 2025 jyldyń 16 qyrkúıeginen bastap kúshine engen QR Qylmystyq kodeksiniń 232-1-babynyń talaptaryn buzǵany úshin 7 dropper men 1 dropovod qylmystyq jaýapkershilikke tartyldy. Jaýapkerlerden 61 mln teńgeden astam keltirilgen shyǵyndy jábirlenýshilerge qaıtarý týraly sheshimder qabyldandy, — dep qosty basqarma bastyǵy.
Eske sala keteıik, budan buryn BQO-da ınternet-alaıaqtar jábirlenýshilerge 1,8 mlrd teńge zalal keltirgenin jazǵan edik.
