BQO-da ınternet-alaıaqtar jábirlenýshilerge 1,8 mlrd teńge zalal keltirgen

ORAL. KAZINFORM – Batys Qazaqstan oblysynda jyl basynan beri 564 ınternet-alaıaqtyq deregi tirkeldi. 

BQO polıtsııa departamenti kıberqylmysqa qarsy is-qımyl basqarmasynyń bastyǵy, polıtsııa polkovnıgi Artýr Musaǵalıevtiń óńirlik kommýnıkatsııalar qyzmeti alańynda ótken brıfıngide málim etkenindeı, bul ótken jyldyń osy kezeńimen (469) salystyrǵanda, 20,3 paıyzǵa kóp.

Artýr Ǵaısaulynyń sózine qaraǵanda, jábirlenýshilerge keltirilgen jalpy zalal kólemi 1 mlrd 800 mln teńgeden asty. 

– Alaıaqtyqtyń zaldarynan eń kóp zardap shekkender – áleýmettik osal toptar, atap aıtqanda, jumyssyzdar – 201, zeınetkerler – 108. Sondaı-aq jeke kompanııanyń 161 qyzmetkeri, bilim berý salasynan – 59, medıtsınadan – 28, memlekettik qyzmetshilerden 7 adam aldanǵan. Olardyń shamamen 70 paıyzdan astamy polıtsııa qyzmetkerleri tarapynan aldyn ala eskertilgen nemese ınternet-alaıaqtardyń tásilderi týraly habardar bolǵan. Al keıbireýleri buǵan deıin osyndaı alaıaqtyqqa ushyraǵan, - dedi A.Musaǵalıev. 

Onyń aıtýynsha, bıyl 73 adamǵa qatysty 160 qylmystyq is óndirisi aıaqtaldy. Bul ótken jylǵydan (99) 61,8 paıyzǵa kóp. ıAǵnı ınternet-alaıaqtarmen qatar olarǵa járdemdesken dropperler, dropovodtar, krıptovalıýtamen aınalysýshylar, belsendi úles qosqandar men kýrerler jaýapqa tartyldy. Sonymen qatar 7 adamǵa qatysty 18 qylmystyq isti jyl sońyna deıin sotqa joldaý josparlanýda. 

– Buǵan qosymsha sot protsesteriniń nátıjesi boıynsha jábirlenýshilerge 377 mln teńgeden astam shyǵyndy óndirý týraly sheshimder qabyldandy. Búgingi tańda ınternet-alaıaqtyqtyń eń keń taraǵan tásili – jalǵan bank qyzmetkeri retinde habarlasyp, jábirlenýshiniń bank shotyn qorǵaý syltaýymen qońyraý shalý arqyly aldaý. Bıyl osy ádiske oblystyń 365 turǵyny túsip qalǵan. Sondaı-aq jalǵan qyzmet kórsetý (72), ınvestıtsııaǵa salym salý syltaýy (24), onlaın taýar satyp alý (36), onlaın nesıelendirý (48), dosynyń atynan qońyraý shalý (8), jumysqa ornalastyrý (3), aqshany zańsyz qolma-qol qarjyǵa aınaldyrý (8) arqyly aldaý kezdesedi, - dedi basqarma bastyǵy.

Eske sala keteıik, budan buryn BQO-da alaıaqtarǵa senip qalǵan kásipkerdiń 22 mln teńgesinen aıyrylǵanyn jazǵan edik.