BQO-da ınsýlınge táýeldi 57 bala esepte tur
ORAL. QazAqparat - Batys Qazaqstan oblysynda ınsýlınge táýeldi 57 bala esepte tur, dep habarlaıdy QazAqparat tilshisi.
BQO densaýlyq saqtaý basqarmasynyń basshysy Qanat Tósekbaevtyń aıtýynsha, balalaryna qajetti dári-dármektiń jetispeıtini jóninde shaǵym aıtqan 15 ata-ana atalmysh mekemege kelgen.
Basqarma basshysynyń sózine qaraǵanda, qazirgi tańda dıabetpen aýyratyn balalar úshin de, eresekter úshin de ınsýlın jetkilikti. Áńgime shprıtster týraly bolyp otyr. Ata-analar suraǵan №5 shprıts joq, bary №6, №8 jáne №12 shprıtster ǵana. Bulardyń bárin biryńǵaı dıstrıbıýtor satyp alady.
«Pompa júıesine qatysty másele de týyndap otyr. Bular qoımada bolǵanymen, onyń jaramsyz ekendigi jóninde óndirýshi kompanııanyń ózinen hat kelgen. Sondyqtan ony túgeldeı aýystyrý kerek. Bul - barlyq jerge ortaq jaǵdaı. Jýyq arada balalardy qajetti dári-dármekpen qamtamasyz etý máselesin sheshý úshin arnaıy monıtorıngtik top quryldy», - dedi Q.Tósekbaev.
