BQO-da ınfektsııalyq statsıonarda jatqandar sany 355-ke jetti
ORAL. QazAqparat – Batys Qazaqstan oblysynda 596 tósek-orny bar 8 ınfektsııalyq statsıonarda 355 adam jatyr. Bul týraly oblys ákimi Ǵalı Esqalıevtiń tóraǵalyq etýimen ótken jedel shtab otyrysynda aıtyldy, dep habarlaıdy QazAqparat tilshisi.
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń málim etkenindeı, qazirgi kezde juqpaly aýrýlar aýrýhanalary 59,6 paıyzǵa tolǵan.
Sonyń ishinde 15 adam jansaqtaý bóliminde jatyr.
Jyl basynan beri koronavırýstan 68 adam kóz jumdy.
Arman Talǵatulynyń sózine qaraǵanda, indettiń jańa shtamdarynyń burynǵyǵa qaraǵanda, juǵý kórsetkishi 70 paıyzǵa deıin jetedi. Baqylaý kórsetip otyrǵanyndaı, brıtandyq shtamm basqa túrlerinen góri 1,7-2 ese tez taralady.
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaev óńirde indettiń naýryz meıramdarynan keıin kúrt órship ketkendigin jetkizip, karantındik shekteý sharalaryn 16 sáýirge deıin uzartýdy usyndy.
Onyń aıtýynsha, jyl basynan beri oblysta 5655, sonyń ishinde naýryz aıynda 1868 adamnan indet tabyldy. Sońǵy aptada (22-28 naýryzda – 538) aldyńǵyǵa (15-21 naýryzda – 511) qaraǵanda, aýrý kórsetkishi 5 paıyzǵa kóbeıdi.
Naýryzda syrqattanǵandardyń basym kópshiligi nemese 69,9 paıyzy Oralda (1307), sondaı-aq Bórli aýdanynda 9,7 paıyzy (183), Báıterekte 7,6 paıyzy (142) tirkelip otyr.
«Іndetpen kúres bastalǵanyna bir jyldan asty. Sodan beri adamdar qarapaıym sanıtarlyq talaptardy saqtaýǵa úırendi. Áıtse de aýrý bizdi aınalyp ótedi dep saqtanbaı júrgender, toı-sadaqa jasaýshylar áli de barshylyq. Eger bulaı sozyla berse, karantın uzaq saqtalady. Jyl basynan beri 68 adam ómirden ozsa, aýrý juqtyrý kórsetkishi 20 paıyzǵa ósti. Koronavırýstyń jańa túrleri óte tez taraıdy ári aǵzaǵa qatty áser etedi. Sondaı-aq aýrý belgileri joq adamdar kópshilik jınalatyn jerlerge baryp, ózgelerge juqtyrýda. Munyń sońy qaıǵyly jaǵdaılarǵa soqtyrýda. Іndettiń óte qaýipti ekendigin túsinetin ýaqyt jetti», dedi Ǵ.Esqalıev.
Eske sala keteıik, budan buryn Batys Qazaqstanda 4,4 myń adamnyń koronavırýsqa qarsy ekpe salynǵanyn jazǵan bolatynbyz.
